Ад «А» да «Р». У гродзенскую школу № 39 набралі 16 першых класаў
«Гэта яшчэ не рэкорд. У нас такая колькасць класаў ад 2015 года», — расказалі «Нашай Ніве» ў школе.
Агулам, першакласнікамі ў 39 школе сталі 397 дзяцей.
«Сёлета ў пачатковай школе ў нас будуць вучыцца 16 першых, другіх і трэціх класаў. Чацвёртых класаў наогул 17».
«У класах вучацца ад 24 да 30 чалавек. Са сталовай спраўляемся, — жартуюць у прыёмнай, — ніхто не абедае стоячы, а вось лінейкі на 1 верасня для першакласнікаў давялося рабіць аж тройчы».
Тлумачыцца такая колькасць дзяцей проста. Альшанка — новы, малады раён Горадні. А вось школа там працуе ўсяго адна.
У суседніх школах сітуацыя падобная.
У сярэдняй школе № 40, напрыклад, сёлета набралі 10 першых класаў, а вось другакласнікі вучацца ў класах з літарамі ад «А» да «П». Другіх класаў у 40 школе — 15.
Каментары