Работнікі ААТ «Някрашынскі» Акцябрскага раёна Гомельскай вобласці ў аўторак раніцай не выйшлі на працу. Так людзі пратэставалі супраць звальнення дырэктара гаспадаркі Васіля Лаханскага. У сітуацыі разбіраўся Tut.by.
— Раніцай прыйшоў, паклаў ключы на стол і заплакаў, — распавядаюць працаўнікі. Яны не разумеюць, за што мог быць звольнены Васіль Пятровіч.
— Кажуць, што старшыні райвыканкама паскардзіліся даяркі: нібыта каровам не хапае корму — і менавіта за гэта яго выклікалі ў райвыканкам. Але гэта няпраўда, — кажа адна з работніц гаспадаркі. — Лепшага кіраўніка мы не бачылі. Пры ім мы сталі атрымліваць добрую зарплату. Механізатары маюць тысячу рублёў — і ўсіх усё задавальняла.
Людзі не пагадзіліся з рашэннем высокага кіраўніцтва і патрабавалі вярнуць дырэктара.
І, здаецца, вярнулі. Прынамсі пра гэта паведаміў старшыня райвыканкама Віктар Палуянаў.
— Адбылося непаразуменне. Ніхто не звольнены. Адбылася размова, імаверна, нас не так зразумелі. Зараз усе працуюць, пастаўленыя задачы. Усё добра, — запэўніў кіраўнік раёна.
Сам звольнены і адноўлены дырэктар у гутарцы з Tut.by таксама назваў сітуацыю непаразуменнем. «Магчыма, мы не так адзін аднаго зразумелі», — выказаў меркаванне Лаханскі. А затым раптам дадаў, што кіруе гаспадаркай ужо 19 гадоў і 4 месяцы — і быў узрушаны падтрымкай людзей. «Гэта лепш за ўсялякі ордэн», — прызнаўся Васіль Пятровіч.
Цяпер чытаюць
Хто той рэдактар беларускай Вікіпедыі, якога пасадзілі на два гады за «дыскрэдытацыю Беларусі»23
Каментары