Так мяркуюць у Мінадукацыі і дадаюць: «Яны мала што даюць. Эфектыўнасць іх выкарыстання невысокая».
У 2009 годзе трэба адмовіцца ад масавага набыцця камп’ютэрных класаў у школах Беларусі.
Пра гэта заявіў дырэктар галоўнага інфармацыйна‑аналітычнага цэнтра Міністэрства адукацыі доктар тэхнічных навук Мікалай Лістапад 11 снежня на канферэнцыі «Інфармацыйныя тэхналогіі ў адукацыі» ў Мінску.
«Яны мала што даюць. На мой погляд, эфектыўнасць іх выкарыстання невысокая», — сказаў М.Лістапад.Адмова ад набыцця камп’ютэрных класаў у школах дазволіць зэканоміць фінансавыя сродкі. У цяперашніх эканамічных умовах фінансаванне дзяржпраграмы «Комплексная інфарматызацыя сістэмы адукацыі Беларусі» на 2009 год будзе скарочана, заявіў чыноўнік.
«Трэба засяродзіць намаганні на больш эфектыўным выкарыстанні наяўных рэсурсаў: стварыць аб’яднанні інфармацыйнага асяроддзя, дзе гэта магчыма, злучыць установы адукацыі сеткай», — лічыць прадстаўнік Мінадукацыі.
Паводле яго слоў, на будучыню неабходна шукаць іншыя падыходы да аснашчэння школ камп’ютэрнай тэхнікай. Цяпер адзін з іх абмяркоўваецца ў міністэрстве.
«Трэба паставіць задачу — каб кожны вучань меў свой ноўтбук», — заявіў М.Лістапад.Паводле яго слоў, у школе павінна быць адзіная лакальная сетка, да якой «з гэтым ноўтбукам вучань павінен падключыцца». Усе лакальныя сеткі павінны быць аб’яднаны высакахуткаснымі каналамі сувязі ў адзіную электронную адукацыйную прастору краіны. «Многія кажуць, што гэта вельмі дорага», — зазначыў чыноўнік.
Ён лічыць, што гэтую праблему можна вырашыць, калі правільна сфармуляваць патрабаванні да ноўтбука.
У найбліжэйшы час, сказаў М.Лістапад, у Мінску будзе набыта некалькі мабільных класаў, і можна будзе «паглядзець, што з гэтага атрымаецца».
Акрамя адмовы ад закупкі камп’ютэрных класаў прадстаўнік Мінадукацыі паведаміў пра іншыя меры, якія плануецца прыняць у сферы інфарматызацыі адукацыі ў сувязі са скарачэннем сродкаў. Так, у 2009 годзе паменшыцца колькасць распрацовак электронных сродкаў навучання, бо многія прадукты, што распрацоўваюцца, не заўсёды запатрабаваны. У наступным годзе плануецца скараціць колькасць распрацовак сайтаў і парталаў, адмовіцца ад стварэння новых сістэм кіравання.
Цяпер чытаюць
Мігранцкі крызіс, арганізаваны Лукашэнкам, — усё? Вось што паказваюць лічбы7
Каментары