Беларускія школьнікі масава ўдзельнічаюць у расійскай алімпіядзе, якая дае права на бясплатнае паступленне ў Маскву
Чытач з Полацка даслаў у «Нашу Ніву» інфармацыю пра тое, што полацкіх школьнікаў у выходны дзень заклікаюць удзельнічаць у «экзамене ў адну з маскоўскіх ВНУ».
«Не асуджаю імкненне дзяцей вучыцца ў добрым універсітэце. Разумею жаданне ВНУ атрымаць таленавітую моладзь. Але якая зацікаўленасць у гэтым школы?» — пытаецца чытач, звяртаючы ўвагу на тое, што беларуская дзяржава навучае дзяцей бясплатна не для таго, каб іх адразу ж у школах пераваблівалі расіяне.
Як высветліла «Наша Ніва», усё ж гаворка ідзе пра маркетынгавую стратэгію МФТІ (Маскоўскага фізіка-тэхнічнага інстытута).
Гэтая навучальная ўстанова праводзіць уласную алімпіяду, якая пазіцыянуецца як «міжнародная» і праходзіць у электронным фармаце. Паўдзельнічаць можа любы школьнік, беларускім школьнікам пра такую магчымасць расказваюць звычайна іх настаўнікі.
Адна з полацкіх настаўніц па фізіцы патлумачыла нам механізм:
«Гэта пытанне саміх вучняў і іх бацькоў, я ні за што не агітую, мая работа — даць ім веды. Некаторыя разглядаюць алімпіяду МФТІ як бясплатную трэніроўку да рэспубліканскіх алімпіяд. Дзеці гатовыя ўдзельнічаць у любых алімпіядах, — тлумачыць яна. — У алімпіядзе МФТІ электронная рэгістрацыя і ўдзел, некалькі этапаў. Тыя, хто добра прайшоў усе этапы, атрымліваюць магчымасць удзельнічаць у конкурсе на квоту для беларусаў, гэта азначае — паступіць у МФТІ без праходжання ЕГЭ і экзаменаў».
Жанчына звяртае ўвагу, што расіяне робяць хітра і выдаюць дыпломы хіба не кожнаму ўдзельніку, які хоць нешта рашыў. Гэта цешыць дзяцей, бо на сур'ёзных алімпіядах, кшталту той, што праводзіць Міністэрства адукацыі, дыпломаў выдаецца мала.
«У алімпіядзе МФТІ можна ўдзельнічаць з 8 класа, збіраючы бонусныя балы, і да 11 класа быць прыгажуном», — сказала яна і пахвалілася тым, што за апошнія тры гады па два чалавекі з яе выпускаў гарантавана паступалі ў Маскву.
Жанчына не лічыць такую сітуацыю праблемай. Яна сцвярджае, што выпускнікі аналагічных спецыяльнасцяў атрымліваюць мізэрныя заробкі ў Беларусі і або сыходзяць у ІТ, або ўсё адно з'язджаюць у іншыя краіны.
«Таксама дыпломы МФТІ залічваюцца ў рэйтынгах школ, бо калі ты настаўнік і твае вучні не прыносяць дыпломаў, то ты — кепскі настаўнік», — сказала яна. Маўляў, паляцець на сапраўдную міжнародную алімпіяду, кшталту Жаўтыкаўскай у Казахстане, у іх няма грошай.
У Мінадукацыі «Нашай Ніве» адказалі, што ўдзел у алімпіядах кшталту МФТІ — добраахвотная справа, бо яны праводзяцца ў сеціве.
Галыгіна прымусілі апраўдвацца за зварот да сілавікоў у 2020-м17
Каментары