Ярмошына: На якой падставе публікуюць здымак майго дома? — ФОТА дома Ярмошынай
Старшыня Цэнтрвыбаркама Лідзія Ярмошына абурылася тым, што на старонках СМІ з'яўляецца здымак яе дома ў Драздах — элітным квартале Мінска, дзе жыве лукашэнкаўская наменклатура.
«Цікава, з якой пісьмовай згоды партал Tut.by публікуе на сваіх старонках здымкі хат, кветнікі чыноўнікаў і гэтак далей. Як, уласна, і мой дом, які трапляе ў матэрыялы, якія вельмі чытаюць. На якіх падставах? Калі мы іх [журналістаў] будзем кантраляваць за гэта?», — цытуюць Naviny.by Ярмошыну.
Чытайце: Ад Абельскай да Ярмошынай: 113 уладальнікаў катэджаў у Драздах, поўны спіс
Лідзія Ярмошына атрымала зямлю на Ціхім завулку ў канцы 2007 года. Яна не набывала ўчастак па рынкавым кошце.
У пачатку 2010 года яна дабудавала свой катэдж.
«Ну, па-першае, я прадала кватэру, — тлумачыла яна паходжанне сродкаў на будаўніцтва катэджа ў Драздах у інтэрв'ю «Еўрарадыё». — Па-другое, у мяне былі пэўныя зберажэнні. А па-трэцяе, я пазычыла ў сваіх вельмі заможных сябровак. Гэта прыватныя натарыусы ў горадзе Калінінградзе. Абышлося мне будаўніцтва прыблізна ў 300 тысяч умоўных адзінак».
Насамрэч, з кватэрай у раёне вуліцы Альшэўскага Ярмошына развіталася толькі ў канцы 2010 года. Пакуль пасля Плошчы-2010 сотні дэманстрантаў чакалі Новы год у камерах следчых ізалятараў, Лідзія Ярмошына прадавала сваю трохпакаёўку за $89 тысяч.
***
Лідзія Ярмошына
Нарадзілася 29 студзеня 1953 у Слуцку. Скончыла юрыдычны факультэт Калінінградскага дзяржаўнага ўніверсітэта (1975). У 1975—1987 працавала юрыскансультантам у Калінінградзе і Бабруйску. У 1987--1988 — памочнік пракурора Кастрычніцкага раёна Калінінграда. У 1988—1996 — кіраўнік юрыдычнай службы Бабруйскага гарвыканкама. У 1992—1996 — сябра ЦВК, з 1996 — старшыня ЦВК.
Каментары