Суд горада Шэньчжэнь (правінцыя Гуандун) прысудзіў кітайскага вучонага Хэ Цзянькуя да трох гадоў турмы і штрафу ў 3 млн юаняў (каля $ 430 тыс.) за правядзенне незаконнага эксперыменту з нараджэннем двайнят з генетычна мадыфікаваных эмбрыёнаў. Пра гэта гаворыцца ў рашэнні суда, піша ТАСС.
«Улічваючы злачыннае дзеянне траіх абвінавачаных, яго характар і ступень сацыяльнай небяспекі, прызначыць Хэ Цзянькуя пакаранне ў выглядзе турэмнага зняволення тэрмінам тры гады і штраф 3 млн юаняў», - адзначаецца ў прысудзе.
У лістападзе мінулага года Хэ Цзянькуй з Паўднёвага навукова-тэхналагічнага універсітэта (Шэньчжэн) абвясціў, што яму ўдалося стварыць першых у свеце генетычна мадыфікаваных людзей.
Гены дзяўчынак-двайнят, якія тады нібыта з'явіліся на свет, былі адрэдагаваныя пры дапамозе тэхналогіі CRISPR-Cas9, што дазваляе знайсці ў ДНК патрэбны ген і выдаліць або падправіць яго.
У блізнят быў адрэдагаваны ген CCR5, змена якога павінна знізіць рызыку інфіцыравання ВІЧ.
Дзяўчынак назвалі Нана і Лулу.
Каментары