Другая смерць у ДК Лёзна — за два тыдні згарэла 49-гадовая дырыжорка
49-гадовая Антаніна Слінькова разам з мужам жыла ў аграгарадку Зубкі Лёзненскага раёна. Яна працавала ў мясцовым доме культуры, была галоўным дырыжорам Віцебскага абласнога метадычнага цэнтра народнай творчасці і адраджала традыцыі інструментальнага фальклору.
Пра тое, што здарылася, расказаў яе сын Арцём.
Увечары 23 красавіка ў жанчыны з'явілася тэмпература — 37,3. Яна выпіла таблетку, каб збіць яе, а на наступны дзень папрасіла сына адвезці яе ў раённую бальніцу праверыцца. Флюараграфія паказала аднабаковую пнеўманію.
«Мы спачатку не хваляваліся. Дактары казалі, што нічога страшнага, гэта лёгка лечыцца», — згадвае сын.
Але 29 красавіка Антаніну ўжо з двухбаковай пнеўманіяй перавялі ў Віцебскую абласную бальніцу. Увялі ў медыкаментозны сон і падключылі да апарата ШВЛ, чысцілі кроў. Стан жанчыны заставаўся стабільна цяжкі. 6 мая яна памерла.
«Ці быў у яе каранавірус, ніхто не сказаў. Бацька і я (бо прыязджаў да сям’і на выходныя) рабілі тэсты — у нас адмоўныя. Як толькі прыйшлі вынікі, мы выйшлі з самаізаляцыі. Але хутчэй за ўсё ў мамы быў каранавірус. Не магла яна ад звычайнай пнеўманіі згарэць за два тыдні. Не было ў яе ніякіх хранічных захворванняў, яна пастаянна была на ўпэўненай хадзе. Мама магла за дзень усе клубы Лёзненскага раёна аб’ездзіць, была вельмі энергічная», — кажа сын.
Дзе жанчына магла заразіцца, ён не ведае. Кажа, яна кожную раніцу ездзіла на цягніку на працу ў Віцебск, магла і там падхапіць.
На пахаванні жанчыны прысутнічалі родныя і аднавяскоўцы. Сабрацца на развітанне з Антанінай медыкі не забаранялі.
«Але калі мы з морга яе забіралі, труна была закрытая, і больш яе не адкрывалі. Яе там запакавалі ў пакет, не ведаю, як гэта правільна сказаць», — спрабуе падабраць словы сын.
Сям’я дагэтуль не можа паверыць, што Антаніны так хутка не стала.
«У гэтым месяцы яна павінна была стаць двойчы бабуляй, у маі ў яе з татам гадавіна вяселля. Такія планы былі…» — смуткуе Арцём.
Гэта не першая смерць для Лёзненскага цэнтра культуры. Два тыдні таму памёр рэжысёр народнага тэатра Генадзь Цыганкоў. У яго была двухбаковая пнеўманія і каранавірус.
«Сына на пахаванне не пусцяць». У Лёзне ад пнеўманіі памёр рэжысёр тэатра
Загінуў беларускі добраахвотнік Васіль «Дзір» Рапіцкі11
Каментары