Аляксандр Лукашэнка падкрэслівае важнасць якаснай працы з моладдзю ў навучальных установах. Пра гэта ён заявіў сёння на сустрэчы з педагагічным актывам краіны, піша БЕЛТА.
«Не будзем займацца сваімі дзецьмі мы, імі зоймуцца чужыя настаўнікі. Гэта жыццё. І тады ў гісторыі незалежнай Беларусі, якую павінны працягнуць нашы дзеці, можам паставіць кропку. Нават тлустую», — сказаў кіраўнік дзяржавы.
Аляксандр Лукашэнка канстатаваў, што, на жаль, у параўнанні з савецкім перыядам адбыўся адкат назад у працы з моладдзю. «Кожны універсітэт, інстытут, факультэт павінен мець набор такіх механізмаў працы. І альтэрнатыва віртуальнага жыцця павінна быць цікавай», — упэўнены ён.
«Вы ведаеце, што адбываецца з моладдзю, якая застаецца сам-насам з інфармацыйнай прасторай. Я проста кажу: там ёю ўжо займаюцца іншыя выхавальнікі, замежныя ідэолагі, а часам і злачынцы. І тое, што сёння адбываецца з некаторымі нашымі дзецьмі, гэта пытанне не толькі да бацькоў, але і да ўсіх нас, усёй сістэмы нашай адукацыі», — падкрэсліў беларускі кіраўнік.
Ён таксама адзначыў важнасць вучыць студэнтаў думаць, рабіць самастойныя высновы, выходзіць за рамкі праграмы, займацца самаадукацыяй. «Але не губляючы сувязі з дзяржаўнай ідэалогіяй. І не трэба баяцца гэтага слова. Пакажыце мне хоць адну моцную і самадастатковую краіну ў свеце, якая не надае гэтай тэме вялікае значэнне», — заўважыў ён.
Каментары