«Я за яе не падпісваўся!» Начальніца з «Белметала» трапіла ў выбарчую камісію з фальсіфікаванымі дакументамі
58-гадовы мінчук Алег Зыль пару дзён таму нечакана даведаўся, што нібыта вылучыў у склад участковай выбарчай камісіі начальніцу аддзела кадраў і справаводства ААТ «Белметал» Таццяну Плашчынскую.
З «дапамогай» Зыля і яшчэ дзевяці грамадзян яна стала членам камісіі на ўчастку для галасавання №90 Заводскага раёна Мінска.
«Колькі дзён таму на вайбер мне прыйшло паведамленне ад адваката Сяргея Зікрацкага, ён выпадкова сфатаграфаваў заяву, у якой было і маё прозвішча.
Вядома, што ніякі подпіс я не ставіў. На здымку не мой подпіс!
Сяргей склаў заяву ў міліцыю Заводскага раёна Мінска. Пад ёй падпісалася яшчэ пяць ці шэсць чалавек», — расказаў «НН» Алег Зыль.
Сам мужчына працуе ў сферы аховы, ніякага дачынення да «Белметала» не мае. Кажа, што дадому да яго ніхто не прыходзіў.
«Упершыню чую пра такую Таццяну Плашчынскую, я з ёй ніколі не гаварыў. У спісе людзі, якія прапісаныя па суседстве са мной на вуліцах Райніса, Народнай. Магчыма, ЖЭС здаў нейкі спіс ці нехта яшчэ», — кажа спадар Зыль.
Калі ўважліва паглядзець на дакумент, то звяртаеш увагу: большасць подпісаў датаваныя яшчэ лютым, калі выбары яшчэ нават не абвесцілі! Тым не менш гэта не стала перашкодай для ўключэння Плашчынскай у камісію.
Даты ў дакуменце кожны падпісант пазначае ўласнаручна, але напісанне гэтых лічбаў падазрона надзвычай падобнае. Шмат агульнага і ў подпісах, якія нібыта ставілі людзі ў падтрымку Плашчынскай. Звярніце ўвагу, што мінімум у сямі подпісах знізу пад імі ёсць характэрная рысачка. Няўжо так ва ўсіх супала?
«НН» адшукала спадарыню Плашчынскую, каб пацікавіцца, як жа праходзіў збор подпісаў? «Усе гэтыя подпісы збіраліся разам з нашым намеснікам генеральнага дырэктара па ідэалагічнай рабоце [ААТ «Белметал»] Аляксандрам Мякішавым. У мяне ёсць сведка — вось і ўсё».
Мы пацікавіліся ў спадарыні Плашчынскай, чаму ў дакуменце пазначаны люты. «Я не ведаю, дакументы па выніку падаваў Мякішаў, ён у нас старшыня выбарчай камісіі. Мы збіралі і аддавалі дакументы Мякішаву, а ўжо ён адвозіў іх у адміністрацыю», — сказала Плашчынская.
«Вы хадзілі па дамах людзей?»
«Па якіх дамах? Пазваніце Мякішаву, калі ласка. На падставе чаго вы ўвогуле збіраеце гэтую інфармацыю? Мы ўсё робім па законе».
Аляксандр Мякішаў, той самы ідэолаг «Белметала», насамрэч узначальвае камісію на ўчастку Плашчынскай. Ён сам вылучаўся ад Камуністычнай партыі.
«Так, [Плашчынская] хадзіла са мной па дамах. Чаму напісаны люты, я не ведаю. Людзі цяпер шмат чаго могуць сказаць. Сёння ён падпісваецца, заўтра будзе адмаўляцца», — сказаў Мякішаў карэспандэнту «Нашай Нівы».
Журналіст даслаў яму дакументы на вайбер, каб ідэаолаг мог з імі азнаёміцца. «Буду разбірацца, у чым праблема. Сапраўды, незразумела адкуль стаіць гэтае «02». Пакуль нічога каментаваць не магу», — адзначыў ён.
«Вам за такое не сорамна?» — запыталіся ў Мякішава.
«А чаму мне павінна быць сорамна? Паслухайце, вы цудоўна разумееце, што творыцца. Учора людзі падпісаліся, а сёння палічылі за лепшае адмовіцца, бо немэтазгодна. Няхай міліцыя займаецца праверкай, я не супраць. Мне за гэта не сорамна», — сказаў мужчына.
Каментары