«Ja za jaje nie padpisvaŭsia!» Načalnica z «Biełmietała» trapiła ŭ vybarčuju kamisiju z falsifikavanymi dakumientami
58-hadovy minčuk Aleh Zyl paru dzion tamu niečakana daviedaŭsia, što nibyta vyłučyŭ u skład učastkovaj vybarčaj kamisii načalnicu adździeła kadraŭ i spravavodstva AAT «Biełmietał» Taćcianu Płaščynskuju.
Z «dapamohaj» Zyla i jašče dzieviaci hramadzian jana stała členam kamisii na ŭčastku dla hałasavańnia №90 Zavodskaha rajona Minska.
«Kolki dzion tamu na vajbier mnie pryjšło paviedamleńnie ad advakata Siarhieja Zikrackaha, jon vypadkova sfatahrafavaŭ zajavu, u jakoj było i majo proźvišča.
Viadoma, što nijaki podpis ja nie staviŭ. Na zdymku nie moj podpis!
Siarhiej skłaŭ zajavu ŭ milicyju Zavodskaha rajona Minska. Pad joj padpisałasia jašče piać ci šeść čałaviek», — raskazaŭ «NN» Aleh Zyl.
Sam mužčyna pracuje ŭ śfiery achovy, nijakaha dačynieńnia da «Biełmietała» nie maje. Kaža, što dadomu da jaho nichto nie prychodziŭ.
«Upieršyniu čuju pra takuju Taćcianu Płaščynskuju, ja ź joj nikoli nie havaryŭ. U śpisie ludzi, jakija prapisanyja pa susiedstvie sa mnoj na vulicach Rajnisa, Narodnaj. Mahčyma, ŽES zdaŭ niejki śpis ci niechta jašče», — kaža spadar Zyl.
Kali ŭvažliva pahladzieć na dakumient, to źviartaješ uvahu: bolšaść podpisaŭ datavanyja jašče lutym, kali vybary jašče navat nie abvieścili! Tym nie mienš heta nie stała pieraškodaj dla ŭklučeńnia Płaščynskaj u kamisiju.
Daty ŭ dakumiencie kožny padpisant paznačaje ŭłasnaručna, ale napisańnie hetych ličbaŭ padazrona nadzvyčaj padobnaje. Šmat ahulnaha i ŭ podpisach, jakija nibyta stavili ludzi ŭ padtrymku Płaščynskaj. Źviarnicie ŭvahu, što minimum u siami podpisach źnizu pad imi jość charakternaja rysačka. Niaŭžo tak va ŭsich supała?
«NN» adšukała spadaryniu Płaščynskuju, kab pacikavicca, jak ža prachodziŭ zbor podpisaŭ? «Usie hetyja podpisy źbiralisia razam z našym namieśnikam hienieralnaha dyrektara pa ideałahičnaj rabocie [AAT «Biełmietał»] Alaksandram Miakišavym. U mianie jość śviedka — voś i ŭsio».
My pacikavilisia ŭ spadaryni Płaščynskaj, čamu ŭ dakumiencie paznačany luty. «Ja nie viedaju, dakumienty pa vyniku padavaŭ Miakišaŭ, jon u nas staršynia vybarčaj kamisii. My źbirali i addavali dakumienty Miakišavu, a ŭžo jon advoziŭ ich u administracyju», — skazała Płaščynskaja.
«Vy chadzili pa damach ludziej?»
«Pa jakich damach? Pazvanicie Miakišavu, kali łaska. Na padstavie čaho vy ŭvohule źbirajecie hetuju infarmacyju? My ŭsio robim pa zakonie».
Alaksandr Miakišaŭ, toj samy ideołah «Biełmietała», nasamreč uznačalvaje kamisiju na ŭčastku Płaščynskaj. Jon sam vyłučaŭsia ad Kamunistyčnaj partyi.
«Tak, [Płaščynskaja] chadziła sa mnoj pa damach. Čamu napisany luty, ja nie viedaju. Ludzi ciapier šmat čaho mohuć skazać. Siońnia jon padpisvajecca, zaŭtra budzie admaŭlacca», — skazaŭ Miakišaŭ karespandentu «Našaj Nivy».
Žurnalist dasłaŭ jamu dakumienty na vajbier, kab ideaołah moh ź imi aznajomicca. «Budu raźbiracca, u čym prablema. Sapraŭdy, niezrazumieła adkul staić hetaje «02». Pakul ničoha kamientavać nie mahu», — adznačyŭ jon.
«Vam za takoje nie soramna?» — zapytalisia ŭ Miakišava.
«A čamu mnie pavinna być soramna? Pasłuchajcie, vy cudoŭna razumiejecie, što tvorycca. Učora ludzi padpisalisia, a siońnia paličyli za lepšaje admovicca, bo niemetazhodna. Niachaj milicyja zajmajecca pravierkaj, ja nie suprać. Mnie za heta nie soramna», — skazaŭ mužčyna.
Cichanoŭskaja i Zialenski ŭpieršyniu praviali sustreču. Zialenski zaprasiŭ Śviatłanu ŭ Kijeŭ14
Kamientary