Экс-намесніца дэкана журфака БДУ: У Беларусі адбываецца мэтанакіраванае знішчэнне прафесіі журналіста 

Дацэнт кафедры тэлебачання і радыёвяшчання факультэта журналістыкі БДУ, два гады як экс-намесніца дэкана па міжнародных сувязях Ганна Курэйчык выказалася пра затрыманых у Беларусі журналістаў.

Павялічыць

«Сёння адбываецца мэтанакіраванае знішчэнне прафесіі журналіста ў Беларусі. Як чужымі, так і сваімі рукамі. Найгрубейшым чынам парушаюцца артыкулы Канстытуцыі і Закона аб СМІ тымі, хто павінен сачыць за іх выкананнем, — піша Ганна.

— У нас ёсць цэлае Міністэрства інфармацыі, якое ў гэты момант заклапочанае блакаваннем інфармацыйных рэсурсаў, а не выкананнем артыкула 34 «Статус журналіста сродка масавай інфармацыі».

Былая намесніца дэкана адзначае, што сумленным, прафесійным журналістам больш няма месца ў дзяржаўных СМІ.

«Іх замянілі супрацоўнікі RT, якім пляваць, што казаць і пісаць, абы плацілі, яны тут у камандзіроўцы. Звольненыя і замененыя многія кіраўнікі самых розных выданняў. Давер да СМІ прапаў, зніклі рэкламадаўцы».

У 1997 годзе Ганна Курэйчык прымала ўдзел у стварэнні радыё «Сталіца», дзве траціны супрацоўнікаў якога сёлета звольніліся на чале з кіраўніком радыёстанцыі ў сувязі з апошнімі падзеямі ў краіне.

«Я гатовая падпісаць мільён зваротаў і петыцый, але, падобна, тыя, каму яны адрасаваныя, іх нават не чытаюць. Звяртацца да Луцкага? Давыдзькі? Яны ўжо даўно ўсё сказалі і на дыялог не настроены.

Заклікаць калег да салідарнасці? Заклікала, але толькі ў эфіры «Сталіцы» зноў бадзёрыя і жыццярадасныя галасы калегаў звольненых «сталічнікаў». І гэта не RT, а тыя, з кім рабяты пілі каву і размаўлялі за жыццё». 

Ганна патлумачыла «Нашай Ніве», што ніякіх наступстваў пасля публікацыі допіса ў яе пакуль не было: яна працягвае працаваць на журфаку на сваёй пасадзе, а рэакцыя калег відавочная па лайках пад тэкстам.

«Я чытаю пра затрыманні сваіх былых студэнтаў і проста плачу, таму што не ведаю, чым мне ім дапамагчы. Напэўна, ні ў адной прафесіі людзі цяпер настолькі відавочна не падзеленыя, як у журналістыцы. І гэта самы вялікі боль. Я не ведаю, што з гэтым рабіць!» 

Цікава, што раней Ганна Курэйчык на папярэдніх прэзідэнцкіх выбарах неаднаразова заганяла студэнтаў на датэрміновае галасаванне. 

«На датэрміновае галасаванне запрашала, як і ўвогуле на ўдзел у выбарах. Бо заўсёды лічыла і лічу, што неабходна карыстацца грамадзянскім правам выбару, за якое ішла барацьба не адзін год. Я ніколі не падтрымлівала ідэю байкоту выбараў.

Чалавек не можа змяняцца ў адзін момант, аднак можа прыйсці час, калі ён разумее, што нельга займаць нейтральную пазіцыю, трэба выказацца адназначна. Уся сітуацыя з апошнімі прэзідэнцкімі выбарамі стала для мяне такім момантам.

Я не чалавек сацыяльных сетак, мой акаўнт ёсць толькі ў фэйсбуку, і там да апошняга часу былі толькі фотаздымкі з падарожжаў. Але цяпер маўчанне асабіста для мяне непрымальна, таму я вырашыла на сваёй старонцы выказваць свае думкі і меркаванні», — дадае Ганна. 

• 0
• 0
• 0
• 0
• 0
• 0
• 0
• 0