ЗША могуць пацвердзіць знішчэнне каля траціны ракетнага арсеналу Ірана

Чатыры суразмоўцы агенцтва адзначылі, што статус прыкладна яшчэ траціны менш зразумелы, аднак бамбардаванні, верагодна, пашкодзілі, знішчылі або пахавалі гэтыя ракеты ў падземных тунэлях і бункерах.

Адна з крыніц расказала, што разведданыя адносна магчымасцяў Ірана выкарыстоўваць беспілотнікі аналагічныя. Суразмоўца кажа, што існуе пэўная ўпэўненасць у знішчэнні каля траціны з іх.

Reuters заўважае, што ацэнка, пра якую раней не паведамлялася, паказвае, што хоць большасць іранскіх ракет або знішчаныя, або недаступныя, Тэгеран усё яшчэ мае значны арсенал. Магчыма, ён зможа аднавіць некаторыя цяпер пахаваныя або пашкоджаныя ракеты пасля спынення баявых дзеянняў.

Агенцтва адзначае, што гэтыя разведвальныя даныя супярэчаць публічным заявам прэзідэнта ЗША Дональда Трампа пра тое, што ў Ірана «засталося вельмі мала ракет».

У адказ на запыт аб каментарыі прадстаўнік Пентагона заявіў, што колькасць атак іранскіх ракет і беспілотнікаў скарацілася прыкладна на 90% з пачатку вайны. Цэнтральнае камандаванне Узброеных сіл ЗША «таксама пашкодзіла або знішчыла больш за 66% іранскіх ракетных, беспілотных і вайскова-марскіх вытворчых магутнасцей і верфяў», дадаў чыноўнік.

Адна крыніца расказала, што частка праблемы заключаецца ў вызначэнні таго, колькі ўсяго іранскіх ракет захоўвалася ў падземных бункерах краіны да пачатку вайны.

Ізраільскія вайсковыя чыноўнікі сцвярджаюць, што да канфлікту Тэгеран меў 2500 балістычных ракет, здольных дасягнуць Ізраіля. Паводле слоў высокапастаўленага ізраільскага вайскоўца, больш за 335 ракетных пускавых установак было «нейтралізавана». Гэта складае 70% пускавых магутнасцяў Ірана.

Ізраільскія афіцыйныя асобы публічна не кажуць, колькі насамрэч ракет, паводле іх ацэнак, усё яшчэ мае Іран. Аднак у прыватных размовах яны прызнаюць, што ліквідаваць апошнія 30% патэнцыялу Тэгерана будзе цяжэй.

Адначасова з ваеннымі дзеяннямі працягваюцца дыпламатычныя спробы спыніць канфлікт. 25 сакавіка ЗША праз Пакістан накіравалі Ірану план з 15 пунктаў па спыненні вайны на Блізкім Усходзе. Іран у сваю чаргу прапануе ўмовы спынення агню з патрабаваннем ваенных рэпарацый і захаваннем суверэнітэту над Армузскім пралівам.

27 сакавіка паведамлялася, што Пентагон разглядае магчымасць накіравання да 10 тысяч амерыканскіх вайскоўцаў на Блізкі Усход на фоне напружанасці з Іранам.

• 0
• 1
• 0
• 3
• 0
• 0
• 0
• 0