3 студзеня ў вёсцы Леніна ў Слуцкім раёне знайшлі труп 34-гадовага мужчыны. У забойстве вінавацяць раўнівага мужа яго каханкі.
«Паводле папярэдніх звестак, 39-гадовы мужчына прыраўнаваў 34-гадовага вяскоўца да сваёй жонкі і ўдарыў нажом. Малады чалавек ад атрыманых цялесных пашкоджанняў памёр на месцы. Следчыя знайшлі і забралі нож», — паведаміў Следчы камітэт.
Вольга і Аляксандр А. жывуць у вёсцы Леніна. Шматдзетныя бацькі: 5 дзяцей. «Звычайная сям’я. Не праблемныя, не алкаголікі, на ўліках не стаяць, — характарызуюць сям’ю ў мясцовым сельвыканкаме. — Абодва працуюць у калгасе, займаюцца жывёлагадоўляй».
Аляксандр працаваў на мясцовай ферме скотнікам, Вольга — цялятніцай.
Раней у сям’і былі «пэўныя праблемы», кажуць аднавяскоўцы, але цяпер ужо гадоў пяць як усё было нармальна. Вольга не піла ўвогуле, Аляксандр мог выпіць, але алкаголікам яго не лічылі.
«Наша Ніва» пагаварыла з Вольгай. Жанчына не захацела гаварыць падрабязна, але не хавае: у яе быў раман.
«Я знайшла сваё сапраўднае каханне, — кажа Вольга. — З ім мы былі разам амаль год — сёмы месяц пайшоў».
Сапраўднае каханне Вольгі — гэта 34-гадовы Расціслаў К. Ён мясцовы жыхар, таксама працаваў на ферме скотнікам — разам з мужам Вольгі.
«Я працягвала жыць з мужам, але ён стаў мне як чужы. І цяпер я збіралася сыходзіць ад мужа і падаваць на развод. 2 студзеня я расказала пра ўсё мужу. А трэцяга адбылося надзвычайнае здарэнне…» — сцісла распавяла Вольга.
Мясцовыя жыхары расказваюць, што ўначы Расціслаў праводзіў Вольгу дадому. Аляксандр выйшаў пагаварыць. Слова за слова — завязалася бойка. Падчас яе Расціслаў атрымаў удар нажом.
Ці быў Аляксандр п’яны — невядома.
Цяпер муж Вольгі пад вартай. На яго завялі справу за забойства, мужчыну пагражае ад 6 да 15 гадоў. Расціслава К. пахаваюць 5 студзеня на мясцовых могілках.
Цяпер чытаюць
Беларусы ў сацсетках абураюцца, што дэкрэтніцам нібыта плацяць больш, чым тым, хто ходзіць на працу4
Каментары