Урад устанавіў на сваю пастанову «Аб сацыяльна-эканамічным развіцці Рэспублікі Беларусь на 2021 год» грыф «Для службовага карыстання». Гэта вынікае з дакументаў Мінэканомікі, якія вызначаюць прагнозныя паказчыкі развіцця краіны на гэты год, піша Tut.by.
22 снежня 2020 года Аляксандр Лукашэнка падпісаў указ №480 «Аб найважнейшых параметрах прагнозу сацыяльна-эканамічнага развіцця Рэспублікі Беларусь на 2021 год». Дакументам прадугледжаны рост беларускай эканомікі на 1,8%, утрыманне павышэння коштаў на сацыяльна значныя тавары на ўзроўні, не большым за 4,9%, забеспячэнне беспрацоўя ў раёне 4,2-4,4%, будаўніцтва жылля з дзяржпадтрымкай — не менш за 1 млн кв. м і гэтак далей.
Для дасягнення гэтых параметраў ураду было даручана на працягу двух месяцаў зацвердзіць Мэтавы план сацыяльна-эканамічнага развіцця Рэспублікі Беларусь на 2021 год, які забяспечвае «мабілізацыю рэсурсаў для аднаўленчага росту эканомікі пры выкананні макраэканамічнай збалансаванасці».
Саўмін выдаў адпаведны дакумент 17 лютага 2021 года. Але ўстанавіў на пастанову «Аб сацыяльна-эканамічным развіцці Рэспублікі Беларусь на 2021 год» грыф ДСП. Чаму раптам засакрэцілі гэтую пастанову, аналагі якой у ранейшыя гады былі ў публічным доступе, незразумела. Калі прааналізаваць падобны дакумент урада на 2020 год, то адзіны пункт, які мог насцярожыць беларускія ўлады ў цяперашні неспакойны час, гэта «пералік тэрыторый з напружанай сітуацыяй на рынку працы».
У Саўміне не змаглі пракаментаваць сітуацыю.
Каментары