МУС хоча прызнаць экстрэмісцкімі матэрыялы Tut.by і сацсетак партала
Гэта вынікае з заявы МУС Беларусі, накіраванай 3 чэрвеня ў суд Цэнтральнага раёна Мінска, ТАА «Тут бай медыя» і Мінінфармацыі.
У заяве МУС гаворыцца пра тое, што падчас маніторынгу інтэрнэту ў лютым гэтага года на партале і ў сацыяльных сетках партала знайшлі «матэрыялы, якія закранаюць інтарэсы Рэспублікі Беларусь», а пры аналізе матэрыялаў «выяўленыя прыкметы экстрэмізму».
Ведамства адправіла матэрыялы на ацэнку ў Рэспубліканскую экспертную камісію, і 21 мая ў распараджэнне ГУБАЗіКа паступіла яе заключэнне №234 ад 12 мая.
«Згодна з заключэннем камісіі, дзеянні інфармацыйнага рэсурсу Tut.by па інфармацыйным забеспячэнні пратэстаў, стварэнні магчымасці выступаць з дэструктыўнымі заклікамі наносяць шкоду нацыянальным інтарэсам Беларусі ў палітычнай, сацыяльнай, інфармацыйнай сферах і, такім чынам, нацыянальнай бяспецы Беларусі», — гаворыцца ў заяве МУС.
Канкрэтных прыкладаў і назваў матэрыялаў TUT.BY, да якіх паўсталі прэтэнзіі, у дакуменце МУС не прыводзіцца. Яны ёсць у дадатку-экспертызе на 77 старонак, дзе аналізаваліся публікацыі за перыяд са жніўня 2020 па люты 2021 года ўключна. 17 чэрвеня з экспертызай азнаёміліся прадстаўнікі партала. У ёй паказаны шэраг матэрыялаў і цытат, але скапіяваць інфармацыю прадстаўнікам партала не далі, піша БАЖ.
На падставе выкладзенага МУС просіць прызнаць экстрэмісцкай інфармацыйную прадукцыю Tut.by (партала, а таксама яго акаўнтаў у Telegram, Viber, Twitter, «УКантакце», «Аднакласніках» і TikTok). А таксама просіць Мінінфарм уключыць матэрыялы партала ў рэспубліканскі спіс экстрэмісцкіх матэрыялаў і прыняць меры па абмежаванні доступу да інфармацыйнай прадукцыі Tut.by, люстраных версій сайта і аналагаў з іншымі URL-адрасамі, «спрыяльнымі распаўсюджванню вышэйпаказанай інфармацыйнай прадукцыі» ў інтэрнэце на тэрыторыі Беларусі.
«Мама, давай напішам заяву ў міліцыю, ён мяне ўжо дастаў». Маці школьніка з Брэста, які скончыў жыццё самагубствам, расказала пра цкаванне сына8
Каментары