Раніцай у суботу ў Жабінцы супрацоўнікі ўнутраных спраў затрымалі 24-гадовага Дзмітрыя Шутава — сына загінулага 11 жніўня мінулага года Генадзя Шутава. Пра гэта Zerkalo.io паведамілі блізкія мужчыны.
Каля сямі раніцы ў дом, дзе пражывае Дзмітрый Шутаў з мамай, прыйшлі супрацоўнікі органаў унутраных спраў.
— Мне мама напісала паведамленне, што быў ператрус (пакуль невядома, ці праводзілі ў доме Шутава ператрус або агляд — заўв. рэд.) і Дзіму затрымалі. Абшукалі ўвесь дом, потым сказалі, што забяруць яго ў РАУС для гутаркі. Яго забралі, а потым ён патэлефанаваў і сказаў, што на трое сутак [затрымліваюць], — распавядае Анастасія, сястра Дзмітрыя. — Мы таксама патэлефанавалі, спыталі, дзе ён знаходзіцца, нам сказалі, што ён едзе ў Ленінскі РАУС з Жабінкі і што ён не адзін, а з ім яшчэ чатыры чалавекі. Нам сказалі потым, што 15 чалавек з Жабінкі затрымалі.
Што было напісана ў пастанове на ператрус або агляд, родныя Дзмітрыя дакладна не ведаюць, таму што не змаглі ўважліва разгледзець паперу. Па словах Анастасіі, у пастанове гаварылася аб телеграм-канале, які прызнаны ўладамі экстрэмісцкім.
Дзмітрыя раней не затрымлівалі, кажа сястра. Да нядаўняга часу ён працаваў ахоўнікам у гіпермаркеце ў Брэсце, а нядаўна ўладкаваўся на новую працу. Але да затрымання паспеў там адпрацаваць толькі два дні.
— Мы нават не ведаем, як на ягоную працу патэлефанаваць і паведаміць, што ён не выйдзе на працу.
Нагадаем, 11 жніўня ў Брэсце 44-гадовы ўдзельнік пратэстаў Генадзь Шутаў быў паранены сілавіком. Тады ў МУС заяўлялі, што міліцыя страляла ў пратэстоўцаў у Брэсце з агнястрэльнай зброі на паражэнне, тлумачачы гэта пагрозай жыццю і здароўю сілавікоў. Адзін з сілавікоў трапіў Генадзю Шутаву ў галаву. Праз тыдзень мужчына памёр у ваенным шпіталі Мінску.
Праз паўгода загінулы праходзіў абвінавачаным па крымінальным артыкуле. 25 лютага суддзя Святлана Крамянеўская прызнала загінулага вінаватым у «супраціве з ужываннем гвалту». Пацярпелымі па справе праходзілі вайскоўцы вайсковай часткі ў Мар'інай Горцы капітан Раман Гаўрылаў і прапаршчык Арсеній Галіцын. Аляксандра Кардзюкова, які ўвечары 11 жніўня быў разам з Шутавым, асудзілі на 10 гадоў пазбаўлення волі. На судзе ён казаў, што пацярпелыя ў той дзень былі без формы, не прадстаўляліся і не прад'яўлялі дакументы.
Сілавікі расказалі, за што правялі хапун на тэнісным матчы7
Сілавікі расказалі, за што правялі хапун на тэнісным матчы
«Аднавілі грамадскі парадак, не саступіўшы патрабаванням новых выбараў». Што піша Грокіпедыя пра пратэсты, Лукашэнку, мову і як дзеліць спадчыну ВКЛ1212
Каментары