У Беларусі стварылі пункты для бежанцаў. Па дапамогу звярнулася больш за 350 чалавек
У Гомельскай і Віцебскай абласцях створаныя спецыяльныя пункты дапамогі бежанцам. Пра гэта заявіў міністр унутраных спраў Іван Кубракоў. Па яго словах, сілавікі кантралююць сітуацыю, ніякіх праблем з мігрантамі, якія прыязджаюць у Беларусь, каб пасля патрапіць у ЕС, няма.
«Сітуацыя з бежанцамі знаходзіцца пад кантролем, — сцвярджае Кубракоў. — Ніякіх праблемных пытанняў на тэрыторыі Беларусі няма. На разнастайных тэлеграм-каналах з’яўляецца інфармацыя, што праходзяць групы баевкіоў, так званых нелегальных мігрантаў.
Хачу сказаць як міністр унутраных справаў: праваахоўнікамі сітуацыя цалкам кантралюецца. Да нас звярнуліся па дапамогу 368 бежанцаў.
Дапамога з боку дзяржавы ім цалкам аказваецца. 56 грамадзян, у якіх не было магчымасці спыніцца ў гасцініцах, забяспечыць сябе жыллём, звярнуліся да нас.
На сёння створаныя спецыяльныя пункты аказання дапамогі бежанцам на тэрыторыі Віцебскай і Гомельскай абласцях, ім аказваецца як матэрыяльная, так і псіхалагічная дапамога. У гэтым пытанні ніякай праблемы няма».
Узнікаюць пытанні да фармулёвак міністра: хто і як налічыў у Беларусі дадатковых 368 бежанцаў.
Атрыманне такога статусу — доўгая і складаная працэдура, нельга назваць бежанцам любога мігранта. Кожны такі заяўнік павінен пацвердзіць, што на радзіме яму сапраўды пагражае небяспека. Міграцыйная служба вывучае прадстаўленыя дакументы і толькі пасля гэтага выносіць рашэнне, то-бок аўтаматычна статус бежанца ніхто атрымаць не можа.
За ўвесь 2020 год статус бежанца ў Беларусі атрымалі ўсяго 5 чалавек, а звярнулася з такім запытам 589 чалавек (на першым месцы выхадцы з Украіны, на другім — з Расіі, на трэцім — з Сірыі).
Усяго ж на канец 2020-га ў Беларусі было 311 бежанцаў (на першым месцы выхадцы з Афганістана, на другім — з Грузіі, на трэцім — з Сірыі). Гэта звесткі Упраўлення Вярхоўнага камісара па справах бежанцаў ААН у Беларусі.
Каментары