Мінскі гандлёвы цэнтр сцвярджае: Вера Брэжнева прайграла суд з імі. Што адбываецца?
Інфармацыя, што спявачка Вера Брэжнева будзе судзіцца з беларускім гандлёвым домам «Палессе» з’яўлялася і раней. Але цяпер стала вядома, што суд ідзе і нават паціху падыходзіць да фінала. Але чаго хоча Брэжнева? Якія ў яе прэтэнзіі да беларускіх гандляроў?
Тут тонкі момант. Бо калі вы падумалі, што сама спявачка пачула ў гандлёвым доме «Палессе» сваю песню і пайшла ў суд, то гэта не так. Непасрэдна Брэжнева не падавала ў суд на гандлёвы дом, у пасяджэннях яна таксама ўдзел не прымае.
Усім гэтым займаецца Беларускае таварыства аўтараў, выканаўцаў і іншых праваўладальнікаў (БТАВП). Яно і прадстаўляе інтарэсы Брэжневай. БТАВП і падало іск да «Палесся» — за незаконнае выкарыстанне фанаграмы артысткі.
«У кожнай цывілізаванай краіне існуюць падобныя арганізацыі. У нас зносіны з расійскай арганізацыяй, якая займаецца ўпраўленнем правамі. Адпаведна, нам перададзеныя правы ў тым ліку і на фанаграмы Веры Брэжневай, і правы прадстаўляць яе інтарэсы.
Гэта сусветная практыка. Умоўная Адэль жа не будзе сама хадзіць у беларускі суд, напрыклад. Яна ўпаўнаважыць сваю арганізацыю ў Брытаніі, яны будуць заключаць дамовы з арганізацыямі па ўсім свеце, якія на падставе гэтых паўнамоцтваў будуць прадстаўляць інтарэсы артыста, займацца зборам узнагароджання на яго карысць», — растлумачыў «Нашай Ніве» Сяргей Светкін, намеснік дырэктара БТАВП.
Колькі ж грошай хочуць спагнаць з «Палесся»?
«Пакуль ідзе працэс, мы не можам разгалошваць звесткі. Суму кампенсацыі мы можам запрасіць адну, а суд вынесе іншую, таму таксама пакуль не будзем агучваць. Як толькі нашы патрабаванні задаволяць — мы ўсё апублікуем, — адказаў «Нашай Ніве» Светкін. — Магу сказаць толькі, што мы выбіралі памер кампенсацыі з пункту гледжання судовай практыкі».
У «Палессі» «Нашай Ніве» паведамлі, што фінальнае пасяджэнне па справе адбудзецца 24 снежня. Але ў іх ужо ёсць інфармацыя, што прадстаўнікам Брэжневай адмовілі ў іску і ніякую кампенсацыю на карысць спявачкі сплачваць ніхто не будзе.
«Мы выйгралі справу», — адзначылі ў гандлёвым доме «Палессе».
Чытайце таксама: Зарад энергіі і рашучасці. ТОП-20 беларускіх мемаў сыходзячага года
«Калаўра мы не пакрыўдзілі»: стала вядома пра новае месца працы былога старшыні Нацбанка3
Каментары