Еўрасаюз выказвае сур’ёзную заклапочанасць з прычыны чарговага смяротнага прысуду, вынесенага ў Беларусі.
Пра гэта гаворыцца ў заяве, распаўсюджанай 3 жніўня прэс‑службай прадстаўніцтва Еўракамісіі ў Мінску.
«Гэты смяротны прыгавор быў вынесены Мінскім абласным судом Андрэю Жуку. Месяцам раней быў вынесены яшчэ адзін смяротны прысуд», — адзначаецца ў дакуменце.
Еўрасаюз зноў заклікаў Беларусь адмяніць смяротную кару, а для пачатку — увесці мараторый на яе прымяненне.
Еўрасаюз нагадвае пра заявы, зробленыя ўрадам Беларусі на працягу апошніх гадоў, у якіх гаварылася аб намеры значна абмежаваць і ў канчатковым выніку адмяніць смяротную кару.
Таксама ЕС нагадвае пра рэзалюцыю Парламенцкай асамблеі Савета Еўропы, зацверджаную 23 чэрвеня 2009 года. У ёй гаворыцца аб гатоўнасці адмяніць часовае абмежаванне статусу спецыяльнага запрошанага ў ПАСЕ для беларускага парламента, калі ўлады Беларусі ўвядуць мараторый на смяротную кару.
У дакуменце падкрэсліваецца, што Еўрасаюз «выступае супраць прымянення вышэйшай меры пакарання ў любых справах і пры любых абставінах і паслядоўна заклікае да яе адмены па ўсім свеце». «ЕС упэўнены, што забарона смяротнай кары — гэта галоўны элемент абароны чалавечай годнасці і прагрэсіўнага развіцця правоў чалавека», — гаворыцца ў заяве.
Да заявы далучыліся краіны — кандыдаты на ўступленне ў ЕС: Турцыя, Харватыя і Былая Югаслаўская Рэспубліка Македонія, патэнцыяльныя краіны‑кандыдаты: Албанія, Боснія і Герцагавіна, Чарнагорыя, Сербія, краіны Еўрапейскай асацыяцыі свабоднага гандлю і краіны Еўрапейскай эканамічнай зоны Ісландыя і Нарвегія, а таксама Украіна.
Як раней паведамлялася, 17 ліпеня суд мінскай вобласці прызнаў двух жыхароў Салігорскага раёна вінаватымі ў забойстве двух работнікаў СВК «Бальшавік‑Агра», якія перавозілі грошы для выплаты зарплаты работнікам сельгаспрадпрыемства. Злачынства было ўчынена 27 лютага 2009 года блізу вёскі Крывічы. 25‑гадовага жыхара Салігорска суд прыгаварыў да вышэйшай меры пакарання — смяротнай кары, саўдзельніка забойства — да пажыццёвага заключэння.
29 чэрвеня Брэсцкі абласны суд прыгаварыў да смяротнай кары 30‑гадовага жыхара Драгічынскага раёна, які прызнаны вінаватым ва ўчыненні серыі забойстваў пажылых жанчын.
Цяпер чытаюць
Жонка Статкевіча расказала, пра што паспела паразмаўляць з ім2
Каментары