Украіна вырабляла палову ўсяго неону ў свеце. Цяпер усе адчуюць дэфіцыт паўправаднікоў
Неон — газ, неабходны для вытворчасці паўправадніковых чыпаў. Без паставак з Украіны рынак моцна гэта адчуе. Насуперак мантры расійскай і лукашэнкаўскай прапаганды пра заняпад украінскай эканомікі, насамрэч, украінцы былі сусветнымі лідарамі ў многіх сферах.
Штогод у свеце для вытворчасці паўправаднікоў выкарыстоўваецца 540 тон неону. Асноўнымі спажыўцамі гэтага інертнага газу з’яўляюцца краіны-лідары па вытворчасці электронікі — ЗША, Тайвань, краіны Еўропы, Японія, Карэя, Кітай, Індыя і Тайланд. Менавіта ў гэтыя краіны два ўкраінскія заводы пастаўлялі неон, закрываючы ў сукупнасці да 50% сусветнага попыту на яго.
«Інгаз» — прадпрыемства, што знаходзіцца ў Марыупалі, спыненае з першых дзён вайны, Cryoin Engineering з Адэсы таксама не працуе, бо вакол горада кружаць расійскія самалёты і судны.
Другім буйным вытворцам неону была Расія, якая ва ўмовах санкцый, верагодна, не здолее пастаўляць прадукцыю на сусветны рынак.
Праз гэтую сітуацыю попыт на неон значна перавышае прапановы на рынку, што, як паведамляе South China Morning Post, выклікала імгненны рост коштаў — з 290$ за кубічны метр у мірны час да 2500$ цяпер.
Неон таксама выкарыстоўваецца для вытворчасці лазернай і крыягеннай тэхнікі, у святлатэхніцы і рэкламе, радыёэлектроніцы і медыцыне.
Каментары