Давераная асоба Пуціна і аматарка «Наваросіі» публічна адхрысцілася ад былога куміра дзеля кар'еры
Оперная спявачка Ганна Нятрэбка, якая была даверанай асобай Пуціна на выбарах, атрымлівала з ягоных рук узнагароды і нават фатаграфавалася са сцягам «Наваросіі» падчас візіту ў Данецк, асудзіла вайну з Украінай. Пра гэта яна напісала ў Фэйсбуку.
Нятрэбка ў сваім пасце адзначыла:
«Я катэгарычна асуджаю вайну ва Украіне, і мае думкі з ахвярамі гэтай вайны і іх сем'ямі. Мая пазіцыя ясная. Я не з'яўляюся сябрам якой-небудзь палітычнай партыі і не з'яўляюся саюзнікам якога-небудзь лідара Расеі.
Я прызнаю і шкадую, што мае мінулыя дзеянні або заявы маглі быць няправільна вытлумачаныя.
На самай справе, я сустракалася з прэзідэнтам Пуціным усяго некалькі разоў за ўсё сваё жыццё, у прыватнасці, з нагоды ўручэння ўзнагарод у знак прызнання майго мастацтва і на цырымоніі адкрыцця Алімпіяды.
У астатнім я ніколі не атрымлівала аніякай фінансавай падтрымкі ад урада Расеі, жыву ў Аўстрыі і з'яўляюся яе падатковым рэзідэнтам.
Я люблю сваю радзіму, Расію, і шукаю міру і адзінства толькі праз сваё мастацтва. Пасля абвешчанага перапынку я аднаўлю выступленні ў канцы траўня, першапачаткова ў Еўропе».
Прычынай гэтага паста, найверагодней, сталі праблемы з працягам прафесійнай кар'еры спявачкі ў Еўропе. 28 лютага, праз 4 дні пасля пачатку расійскага ўварвання, усе адносіны з Ганнай Нятрэбка разарваў тэатр Metropolitan Opera.
У заяве Тэатра гаварылася, што гэтыя адносіны не будуць адноўленыя, пакуль Расія не спыніць вайну і не кампенсуе Украіне прычыненую шкоду.
Ці дапаможа спявачцы гэтае публічнае адрачэнне ад былога куміра — пакажа найбліжэйшы час.
У загінулай у Сляпянцы дзяўчыне апазналі Яну Кастранкову2
Каментары