Davieranaja asoba Pucina i amatarka «Navarosii» publična adchryściłasia ad byłoha kumira dziela karjery
Opiernaja śpiavačka Hanna Niatrebka, jakaja była davieranaj asobaj Pucina na vybarach, atrymlivała ź jahonych ruk uznaharody i navat fatahrafavałasia sa ściaham «Navarosii» padčas vizitu ŭ Danieck, asudziła vajnu z Ukrainaj. Pra heta jana napisała ŭ Fejsbuku.
Niatrebka ŭ svaim paście adznačyła:
«Ja kateharyčna asudžaju vajnu va Ukrainie, i maje dumki z achviarami hetaj vajny i ich siemjami. Maja pazicyja jasnaja. Ja nie źjaŭlajusia siabram jakoj-niebudź palityčnaj partyi i nie źjaŭlajusia sajuźnikam jakoha-niebudź lidara Rasiei.
Ja pryznaju i škaduju, što maje minułyja dziejańni abo zajavy mahli być niapravilna vytłumačanyja.
Na samaj spravie, ja sustrakałasia z prezidentam Pucinym usiaho niekalki razoŭ za ŭsio svajo žyćcio, u pryvatnaści, z nahody ŭručeńnia ŭznaharod u znak pryznańnia majho mastactva i na cyrymonii adkryćcia Alimpijady.
U astatnim ja nikoli nie atrymlivała anijakaj finansavaj padtrymki ad urada Rasiei, žyvu ŭ Aŭstryi i źjaŭlajusia jaje padatkovym rezidentam.
Ja lublu svaju radzimu, Rasiju, i šukaju miru i adzinstva tolki praz svajo mastactva. Paśla abvieščanaha pierapynku ja adnaŭlu vystupleńni ŭ kancy traŭnia, pieršapačatkova ŭ Jeŭropie».
Pryčynaj hetaha pasta, najvierahodniej, stali prablemy z praciaham prafiesijnaj karjery śpiavački ŭ Jeŭropie. 28 lutaha, praz 4 dni paśla pačatku rasijskaha ŭvarvańnia, usie adnosiny z Hannaj Niatrebka razarvaŭ teatr Metropolitan Opera.
U zajavie Teatra havaryłasia, što hetyja adnosiny nie buduć adnoŭlenyja, pakul Rasija nie spynić vajnu i nie kampiensuje Ukrainie pryčynienuju škodu.
Ci dapamoža śpiavačcy hetaje publičnaje adračeńnie ad byłoha kumira — pakaža najbližejšy čas.
Kamientary