Папа Рымскі: У Кіеў я пакуль не паеду, спачатку трэба з'ездзіць у Маскву
Папа Рымскі Францішак заявіў, што гатовы на перамовы з Уладзімірам Пуціным, каб спыніць вайну. Паводле яго слоў, паведамленне ў Маскву было перададзенае яшчэ на дваццаты дзень вайны, але адказу на яго да гэтага часу няма.
У інтэрв'ю Corriere della Sierra кіраўнік Каталіцкай царквы паведаміў, што ў першы дзень вайны размаўляў па тэлефоне з прэзідэнтам Украіны Уладзімірам Зяленскім. Потым ён сустрэўся з паслом Расіі.
«Я хацеў зрабіць выразны жэст на ўсеагульны агляд і для гэтага пайшоў да расійскага амбасадара. Я папрасіў іх патлумачыць, я сказаў: «Калі ласка, спыніцеся», — адзначыў Папа Рымскі.
Пасля ён даў даручэнне кардыналу Параліна пасля 20 дзён вайны паведаміць пра гатоўнасць пантыфіка наведаць Маскву.
«Адказу мы яшчэ не атрымалі і працягваем настойваць, нават калі я баюся, што Пуцін не можа і не хоча праводзіць гэтую сустрэчу проста цяпер. Але столькі жорсткасці, як не спыніць?» — сказаў Пантыфік.
Папа Рымскі не мае адназначнага меркавання наконт вайсковай падтрымкі Украіны з боку краін НАТА. Ён таксама не мае намеру пакуль наведваць у Кіеў. «У Кіеў я пакуль не паеду. Я паслаў кардынала Міхаіла Чэрні і кардынала Конрада Краеўскага, якія адправіліся туды чацвёрты раз.
Але я адчуваю, што мне не трэба ехаць. Спачатку я павінен паехаць у Маскву, спачатку я павінен сустрэцца з Пуціным.
Але я таксама святар, што я магу зрабіць? Я раблю тое,што магу. Калі б Пуцін адчыніў дзверы…» — сказаў Папа.
Па яго словах, ён таксама меў кантакты з патрыярхам Кірылам. Яны размаўлялі праз Zoom. Пры гэтым Кірыл палову сустрэчы пераконваў Папу Рымскага ў абгрунтаванасці нападу.
«Я сорак хвілін размаўляў з Кірылам праз zoom. Першыя дваццаць ён мне з паперкі зачытваў абгрунтаванні вайны. Я выслухаў і сказаў яму: я нічога ў гэтым не разумею. Браце, мы не дзяржаўныя святары, мы не павінны выкарыстоўваць мову палітыкі, мы павінны гаварыць мовай Ісуса. Мы пастыры аднаго і таго ж святога народа Божага. Таму мы павінны шукаць мірныя шляхі, дабівацца спынення агню. Патрыярх не павінен ператварацца ў служку Пуціна. Я меў сустракацца з ім у Іерусаліме 14 чэрвеня. Гэта мела быць наша другая сустрэча, мы запланавалі яе яшчэ да вайны. Але цяпер ён таксама згодны: стоп, гэта можа быць неадназначным сігналам», — сказаў пантыфік.
Папа Рымскі адзначыў таксама, што прэм'ер-міністр Венгрыі Віктар Орбан пераконваў яго, што да 9 мая ўсё скончыцца. Аднак падзеі апошніх дзён паказваюць на далейшую эскалацыю. «Я настроены песімістычна, але мы павінны зрабіць усё магчымае, каб спыніць вайну», — сказаў Папа Рымскі.
Цяпер чытаюць
Адвакат Дзмітрый Лепрэтар расказаў пра белыя плямы ў справе аб тэракце ў метро7
Каментары