Палітвязень праз два тыдні мусіў выйсці на волю. Каб яго не выпускаць, завялі новую крымінальную справу
Арцём Анішчук мусіў быць на волі 29 чэрвеня. Мужчына амаль што адбыў тэрмін пакарання ў два гады. Але яму прад'явілі новыя абвінавачанні.
Арцёму 33 гады, ён фігурант справы аб пашкоджанні аўтамабіля супрацоўніка дэпартамента выканання пакаранняў МУС. Мужчыну затрымалі 29 верасня 2020 года, абвінавацілі па 339 артыкуле (хуліганства, здзейсненае групай асобаў) і асудзілі на два гады пазбаўлення волі. Этапавалі яго ў магілёўскую калонію №15.
Пасля на Арцёма завялі яшчэ адну крымінальную справу па 411 артыкуле (злоснае непадпарадкаванне патрабаванням адміністрацыі папраўчай ўстановы — такія абвінавачанні беспадстаўна выстаўляюць многім палітвязням). Гэтую справу павінны былі закрыць у сувязі з адсутнасцю складу злачынства. Але гэтага пакуль не адбылося, хаця і была адпаведная пастанова пракуратуры.
У верасні 2021-га мужчыну перавялі ў бабруйскую калонію №2. І незадоўга да заканчэння тэрміну прад'явілі новыя абвінавачанні. Цяпер ужо па артыкуле 369 — публічная абраза прадстаўніка ўлады ў сувязі з выкананнем ім службовых абавязкаў.
Як вядома «Нашай Ніве», 28 снежня 2021 года ў кватэры Арцёма і яго жонкі ў Мінску адбыўся ператрус. Яго праводзілі супрацоўнікі ГУБАЗ. Яны патлумачылі, што нібыта Арцём у сацыяльных сетках непахвальна выказаўся пра двух амапаўцаў. Але ў сацсетках мужчына не зарэгістраваны.
Высветлілася, што завялі новую крымінальную справу за «абразу міліцыянта» ў закрытым тэлеграм-чаце (каментарый быў пакінуты яшчэ да першага затрымання).
У лісце блізкім Арцём напісаў, што яго пераводзяць у Магілёў. Хутчэй за ўсё, у турму №4.
Пры ператрусе ў кватэры канфіскавалі тры тэлефоны. Іх жа забіралі па ранейшай справе па 339 артыкуле. Навошта яны спатрэбіліся сілавікам зноў, невядома.
Дакументы, якія пацвярджалі б правядзенне вобшуку, супрацоўнікі ГУБАЗіКа не пакінулі.
Раней Анішчук заяўляў пра катаванні і збіццё ў магілёўскай ПК-15. Каб спыніць гвалт і ціск, ён на знак пратэсту праглынуў металічныя прадметы.
Пасля пракурорскай праверкі па тых фактах мужчыну збіў начальнік калоніі Аляксей Лазарэнка, пісала «Вясна».
У бабруйскай калоніі №2 Арцём таксама быў пад ціскам. Адмянялі спатканні, падсаджвалі правакатараў, трымалі ў ШІЗА.
20 чэрвеня ў Арцёма дзень нараджэння. Павіншаваць і падтрымаць мужчыну можна лістом:
Турма №4, 212011, г. Магілёў, вул. Крупскай, 99А,
Арцём Ігаравіч Анішчук.
Чытайце таксама:
Фітнэс-трэнера Канстанціна Яршова асудзілі да трох гадоў хіміі
У Мінску затрымалі чарговага супрацоўніка IT-кампаніі
Пратасевіч зноў жэніцца — цяпер з таролагам Настассяй, якая працавала ў элітным медцэнтры «Мерсі»40
Каментары