Кадыраў запатрабаваў у краін АДКБ «пастарацца» для спынення вайны ва Украіне
Кіраўнік Чачні Рамзан Кадыраў абвінаваціў кіраўнікоў краін Арганізацыі Дамовы пра калектыўную бяспеку (АДКБ) у адсутнасці салідарнай пазіцыі наконт вайны ва Украіне.
«Одэкабэшнікі, вы чаму маўчыце? Чаму не кажаце пра сваіх суседзяў? Чаму вы не стараецеся зрабіць так, каб вайна скончылася? Чаму ў вас няма пазіцыі супраць бандэраўцаў, нацыкаў і фашыстаў, якія забівалі нашых продкаў? Мы ж разам ваявалі супраць Бандэры. А цяпер, як ні ў чым не бывала, баючыся санкцый Амерыкі ці Еўропы, усе маўчыце», — сказаў Кадыраў у відэазвароце ў сваім тэлеграм-канале.
Кіраўнік Чачні заклікаў кіраўнікоў дзяржаў АДКБ аб’яднацца і «сказаць сваё слова», пакуль не позна.
«Калі ёсць дзяржава, калі ёсць саюзнік, ён мусіць вызначыцца і зрабіць свой крок. Калі паміж Арменіяй і Азербайджанам была вайна, ключавую ролю зграў Пуцін. Калі Казахстан пачаў губляць суверэнітэт, хто дапамог? Расія! А калі Расіі трэба, усе маўчыце — баіцеся санкцый», — дадаў Кадыраў.
Што такое АДКБ?
Арганізацыя Дагавора аб калектыўнай бяспецы — ваенна-палітычны саюз, створаны дзяржавамі СНД на аснове Дагавора аб калектыўнай бяспецы, падпісанага 15 мая 1992 года. У АДКБ уваходзяць Расія, Беларусь, Арменія, Казахстан, Кыргызстан і Таджыкістан.
Рэакцыя краін АДКБ на вайну ва Украіне
17 чэрвеня прэзідэнт Казахстана Касым-Жомарт Такаеў у прысутнасці Пуціна назваў ДНР і ЛНР «квазідзяржаўнымі тэрыторыямі», дадаўшы, што Казахстан не прызнае незалежнасць самаабвешчаных рэспублік.
16 мая ў Маскве адбылася сустрэча кіраўнікоў краін-удзельніц АДКБ. У адкрытай частцы саміта пра вайну ва Украіне казалі толькі Уладзімір Пуцін і Аляксандр Лукашэнка. Пасля сустрэчы ўдзельнікі выпусцілі заяву, у якой не згадвалася вайна ва Украіне.
У студзені 2022 года Беларусь, Расія, Таджыкістан і Арменія накіравалі сваіх вайскоўцаў для падаўлення пратэстаў у Казахстане.
Аднак пасля ўварвання Расіі ва Украіну ўсе краіны АДКБ, акрамя Беларусі, дыстанцыяваліся ад Расіі і не падтрымалі яе падчас галасавання ў ААН. У той жа час тэрыторыя Беларусі выкарыстоўвалася для бамбардзіроўкі Украіны, а расійскія войскі з Беларусі спрабавалі захапіць Кіеў.
Цяпер чытаюць
«Яна даўнавата ў Беларусі». Бацька Анжалікі Мельнікавай прызнаўся, што яна жывая і здаровая75
Каментары