Былы міліцыянт выносіў бранябойныя патроны, а банда малалетак іх скрала — пад суд пайшлі ўсе. Трагікамедыя ў Магілёве
У магілёўскім гаражным кааператыве «Спадарожнік-2008» разгарнуўся сапраўдны дэтэктыў. Банда палеткаў, самому малодшаму з якіх 15 год, рабавала чужыя гаражы, праломваючы дах. А ўсё накрадзенае складала ў сваім гаражы. У суседа яны ўмудрыліся сцягнуць нават бранябойныя патроны, а потым прадаць. Але аказалася, што ён сам іх дастаў незаконна.
Той гараж, дзе падлеткі знайшлі патроны, належаў былому супрацоўніку Дэпартамента аховы. Банда вынесла адтуль 170 патронаў калібру 7,62х39 і 36 патронаў 7,62х39 з бранябойна-запальнымі кулямі, якімі можна страляць з АКМ, АКС, ручных кулямётаў РПК і гэтак далей. А таксама 519 патронаў 5,45 мм для стральбы з пісталета.
Больш за тое, яны нават знайшлі, каму прадаць бранябойныя патроны — іншаму жыхару горада. За 40 рублёў. Угода адбылася ў тым жа гаражным масіве.
У выніку, калі на банду выйшлі і знайшлі астатняе, то непрыемнасці ўзніклі і ў таго чалавека, у якога патроны скралі — ён праходзіць з падлеткамі па адной справе.
Адкуль былы сілавік, а цяпер ужо шараговы супрацоўнік мясцовага абласнога цэнтра творчасці меў у сваім гаражы бранябойна-запальныя патроны, так і не зразумела.
Магчыма, гэта неяк звязана з месцам яго ранейшай працы.
Судзіць групу падлеткаў, якія, апроч патронаў, павыносілі з гаражоў акумулятары і інструменты, будуць у судзе Ленінскага раёна Магілёва. На іх завялі справу па наступных артыкулах: крадзеж (ч. 2 арт. 205), незаконныя дзеянні з боепрыпасамі (ч. 3 арт. 295), крадзеж боепрыпасаў (ч. 3 арт. 294).
Каментары