Магілёўцу, занесенаму ў «тэрарыстычны спіс» КДБ, далі 3 гады калоніі
Суд Магілёўскай вобласці ў панядзелак, 25 ліпеня, абвясціў прысуд мясцоваму жыхару, архітэктару Аляксею Парэцкаму. Суддзя Алена Картавенка прызнала 40-гадовага мужчыну вінаватым у паклёпе ў дачыненні да Аляксандра Лукашэнкі (ч. 2 арт. 367 КК РБ), а таксама ў распальванні сацыяльнай варожасці (ч.1 арт. 130 КК РБ), піша мясцовы правабарончы канал MAYDAY.TEAM.
Прычынай для крымінальнага пераследу сталі апублікаваныя Парэцкім паведамленні ў інтэрнэце. У сукупнасці мужчыну было прызначана пакаранне ў выглядзе трох гадоў пазбаўлення волі ў калоніі агульнага рэжыму.
Сам Парэцкі да суда знаходзіўся пад падпіскай аб нявыездзе і ўжо ў зале суда яго ўзялі пад варту.
У красавіку Парэцкі 17 дзён правёў на псіхолага-псіхіятрычнай экспертызе ў Навінках, але, згодна з заключэннем лекараў, быў прызнаны здаровым. Вядома, што ў мужчыны маецца 3-я група інваліднасці.
13 чэрвеня Камітэт дзяржаўнай бяспекі з невядомых прычын уключыў Аляксея Парэцкага ў спіс асоб, якія маюць дачыненне да «тэрарыстычнай дзейнасці».
Аляксей Парэцкі — архітэктар, адукацыю атрымаў у Маскоўскім архітэктурным інстытуце. Таксама ён скончыў Маскоўскі дзяржаўны ўніверсітэт, факультэт гісторыі Усходняй Еўропы. Быў удзельнікам рэаліці-шоу «Бітва дызайнераў» на канале ТНТ.
Стала вядома, дзе працуе фаварытка Лукашэнкі Уладлена Зайцава19
Каментары