З'явілася відэа Антонаўскага моста ў Херсоне пасля ўчарашніх удараў УСУ
Акупацыйныя ўлады сцвярджаюць, што было чатыры пападання ў мост, таксама пацярпела будаўнічая тэхніка.
Раней паведамлялася, што пасля начных удараў расійскія войскі атачылі мост з двух бакоў, мясцовых жыхароў блізка не падпускалі. Пра гэта паведамляў першы намеснік кіраўніка аблсавета Херсоншчыны Юрый Сабалеўскі.
Паведамленні пра ўдары па мастах каментавала і кіраўніца прэс-цэнтра АК «Поўдзень» УСУ Наталля Гумянюк:
«Адпрацаваны агнявы кантроль, які мы трымалі некалькі дзён таму на гэтым кірунку, і ў яго ёсць свае вынікі. Пападанні дастаткова «важкія» — як па Кахоўскім, так і па Антонаўскім мосце», — паведаміла яна.
У сваю чаргу, намеснік кіраўніка акупацыйнай адміністрацыі Херсона Кірыл Страмавусаў заявіў, што каля моста акупанты пачалі ўзводзіць пантонную пераправу. Цяпер рух праз Дняпро ў гэтым раёне ажыццяўляецца з дапамогай парома.
Антонаўскі мост праз Дняпро злучае Херсон з левабярэжнай часткай вобласці, якая таксама знаходзіцца пад расійскай акупацыяй. Па мосце войскі Расіі перавозяць тэхніку і боепрыпасы.
Брытанская разведка лічыць кантроль над пераправай праз Дняпро ключавым фактарам зыходу баёў на поўдні Украіны. У Інстытуце вывучэння вайны (ISW) заяўлялі, што ўдары УСУ па мастах вакол Херсона накіраваны на тое, каб перашкодзіць Расіі перакінуць тэхніку, не спыніўшы пры гэтым пастаўку харчавання.
Цяпер чытаюць
«Шынвізэ — кончаны садыст». Адзін з адыёзных начальнікаў калоніі Бабруйска перабраўся ў Германію29
Каментары