«Мы цяпер фактычна ствараем сістэму з нуля». Павел Латушка заявіў аб стварэнні трох падпарадкаваных яму камітэтаў
Кіраўнік НАУ Павел Латушка анансаваў стварэнне трох падпарадкаваных яму камітэтаў у Аб'яднаным пераходным кабінеце. Паводле яго слоў, гаворка ідзе пра санкцыйны камітэт, а таксама камітэты крымінальнага прымусу і кадравай палітыкі. У інтэрв'ю выданню «Зеркало» палітык патлумачыў, што гэта за структуры, чым яны будуць займацца і хто ў іх будзе ўваходзіць.
Перш за ўсё Латушка патлумачыў, што «ў нас не класічная сітуацыя, калі існуе ўся структура органа выканаўчай улады, калі ёсць апарат, сакратарыят, дзейнічаюць міністэрствы, мяняецца толькі кіраўніцтва, якое прыходзіць у дзеючую сістэму, уносіць нейкія палітычныя сэнсы і прымае кіраўнічыя рашэнні.
Мы цяпер фактычна ствараем сістэму з нуля».
Дзеля гэтага, па словах палітыка, не варта чакаць, што на працягу ста дзён (як у звычайнай класічнай сітуацыі) урад павінен будзе даць справаздачу аб выніках. Гэта проста немагчыма.
Латушка сказаў, што ўносяцца прапановы аб тым, каб у рамках паўнамоцтваў прадстаўніка, які адказвае за пытанні транзіту ўлады, санкцый, крымінальнага пераследу і кадравай палітыкі, з'явіліся тры структурныя падраздзяленні. Гэта не азначае, што ў іх сядуць бюракраты па прыкладу класічнага міністэрства. Пералічаныя групы проста будуць адказваць за гэтыя кірункі працы.
Называць такія групы камітэтамі або аддзеламі можна пакуль што ўмоўна, дакладна гэта яшчэ будзе вырашацца.
Першая структура — гэта Камітэт па санкцыях. Яна будзе дзейнічаць пад кіраўніцтвам самога Латушкі.
Як ён кажа: «На сённяшнім этапе мы павінны прааналізаваць эфектыўнасць санкцыйнай палітыкі (перш за ўсё ў эканамічнай сферы) і зразумець, на што неабходна звярнуць асаблівую ўвагу, як дамагчыся таго, каб санкцыі далі вынік, які мы чакаем».
Другая структура можа называцца камітэтам, які будзе займацца крымінальным пераследам:
«Нам патрэбны будзе вялікі аб'ём працы ў рамках нацыянальных юрысдыкцый краін, на тэрыторыі якіх грамадзяне нашай краіны могуць падаваць заявы аб катаваннях, учыненых у дачыненні да іх у Беларусі. Гаворка ідзе і пра міжнародныя прававыя сістэмы ці міжнародныя канвенцыі, якія могуць быць задзейнічаныя».
Нарэшце, трэцяя структура — кадравы камітэт. Гэта новы кірунак, і ён павінен быць сістэматызаваны:
«З аднаго боку, нам трэба рабіць усё, каб даць вельмі выразны сігнал дзяржаўнай сістэме, што сёння яна працуе на знішчэнне беларускай нацыі, на рэпрэсіі, спыненне існавання Беларусі. Іншая частка гэтай задачы — сфармаваць сістэму, якая дазволіць нам у найбліжэйшы час разумець, што ў кожным раёне, у кожнай вобласці пад кожнае міністэрства ў перспектыве ў нас ёсць група прафесіяналаў, здольных у пераходны транзітны перыяд прыняць адказнасць за кіраванне краінай.
Цяпер будуць стварацца групы, якія арганізуюць гэтую працу.
Прытым Латушка падкрэслівае яшчэ раз: на класічныя бюракратычныя структуры няма ні рэсурсаў, ні нейкіх штатных пасад. Шмат будзе залежаць ад кіраўнікоў камітэтаў або аддзелаў.
«Яны павінны прааналізаваць, хто сёння ў дэмакратычных сілах Беларусі займаецца тым ці іншым кірункам, правесці камунікацыю з гэтымі людзьмі. У рамках гарызантальных сувязяў дамовіцца пра аб'яднанне рэсурсаў, усіх ведаў, вопыту, магчымасцяў кожнага чалавека ці іншых арганізацый. Мы павінны аб'яднаць свой рэсурс разам з дыяспарамі, з няўрадавымі арганізацыямі, іншымі ініцыятывамі, каб дасягнуць тут вынікаў як мага хутчэй», — падкрэслівае Латушка.
Імёны будучых кіраўнікоў ужо ёсць, але называць іх Латушка пакуль не стаў.
Каментары
Всё в музыканты не годитесь".
Ещё два года будете заседать!?