Справу журналіста «КП в Беларуси» Генадзя Мажэйкі перадалі ў суд
Следчы камітэт завяршыў расследаванне, пракуратура накіравала ў суд крымінальную справу ў дачыненні да журналіста «Камсамольскай праўды ў Беларусі» Генадзя Мажэйкі, — паведамляе Sputnik.
Папярэдняе следства па крымінальнай справе журналіста доўжылася амаль год.
Генадзь Мажэйка быў затрыманы 1 кастрычніка 2021 года ў Маскве. Ён быў аўтарам матэрыялу, у якім станоўча гаворыцца пра Андрэя Зельцэра ў дзяцінстве. Зельцэр падчас штурму яго кватэры забіў супрацоўніка КДБ Дзмітрыя Федасюка.
Мажэйку будуць судзіць па двух крымінальных артыкулах — ч. 1 арт. 130 і ч. 1 арт. 368 КК.
Санкцыя ч. 1 арт. 130 (распальванне расавай, нацыянальнай, рэлігійнай ці іншай сацыяльнай варожасці) прадугледжвае да пяці гадоў пазбаўлення волі, за абразу прадстаўніка ўлады (ч. 1 арт. 368 КК) пагражае да чатырох гадоў пазбаўлення волі.
Мажэйка з моманту затрымання знаходзіцца пад вартай, цяпер яго утрымліваюць у СІЗА №1 у Мінску.
Справу будзе разглядаць Мінскі гарадскі суд. Пакуль невядома, ці будзе яна разгледжаная ў закрытым судовым пасяджэнні.
Цяпер чытаюць
Беларус раптоўна і без дай прычыны знік у 2006 годзе, а праз 19 гадоў знайшоўся ў вёсцы пад Смаленскам2
Каментары