Святара Уладзіслава Багамольнікава зноў асудзілі, ужо чацвёрты раз
Пра чацвёрты суд над праваслаўным святарам Уладзіславам Багамольнікавым паведамляе «Хрысціянская візія». Цяпер яго будуць утрымліваць за кратамі як мінімум 59 сутак.
Багамольнікаў павінен быў выйсці сёння на волю пасля 44 дзён, але стала вядома, што ён быў зноў асуджаны на 15 сутак.
Нагадаем, 31 жніўня супрацоўнікі ГУБАЗіК выламалі дзверы ў кватэру святара і затрымалі яго. Вядома, што айцец Уладзіслаў перахварэў у няволі на кавід. Пры гэтым для «палітычных» на Акрэсціна перадачы не прымаюць, таму ён утрымліваецца там без ніякіх сродкаў гігіены.
Багамольнікаў — выкладчык Мінскай духоўнай акадэміі. Ён абвяшчаў галадоўку ў падтрымку палітвязня Ігара Лосіка, а таксама служыў ліцію па забітым сілавікамі Раману Бандарэнку.
Каментары