Галоўнай праблемай рэалізацыі дзяржаўнай Праграмы аднаўлення і развіцця вёскі, якой займаецца дзяржпрадпрыемства Белбыт, застаецца нясвоечасовае фінансаванне.
Пра гэта заявіла на прэс‑канферэнцыі ў Мінску кіраўнік упраўлення вытворчай і тэхнічнай палітыкі «Белбыту» Галіна Мыцько. Паводле спадарыні Мыцько, сёлета сродкі на гэты год паступілі толькі ў ліпені, што выклікала значнае адставанне ў рэалізацыі планаў аб’яднання.
Сярод іншых праблем рэалізацыі дзяржаўнай праграмы Г.Мыцько назвала цэнтралізаванае выдзяленне сродкаў, пры якім губляецца час на іх размеркаванне, а таксама адсутнасць кваліфікаваных спецыялістаў у сельскай мясцовасці. Астатняе выклікана нізкім узроўнем заробкаў у сферы абслугоўвання. Толькі ў некаторых раёнах, дзякуючы мясцоваму дафінансаванню, удалося павысіць іх да ўзроўню 650 тыс. рублёў.
У сярэднім іх узровень - 450 тысяч.
Дзяржаўная праграма аднаўлення і развіцця вёскі прадугледжвае фінансаванне ў памеры амаль 100 млрд рублёў на перыяд 2005—2010. Большую частку фінансавання павінны ўзяць на сябе мясцовыя бюджэты — амаль 57 млрд. Прадугледжваецца таксама фінансаванне з рэспубліканскага бюджэту, інавацыйнага фонду Міністэрства гандлю, уласных сродкаў «Белбыту», банкаўскіх крэдытаў і інвестыцый.
Галіна Мыцько таксама адзначыла, што ўстановы бытавога абслугоўвання насельніцтва ў сельскай мясцовасці ў цэлым рэнтабельныя. На сёння дзяржавай рэгулююцца цэны толькі на два віды паслуг — рытуальныя і рамонт абутку. Схема цэнаўтварэння на іншыя паслугі стала цалкам свабоднай. Што ў сваю чаргу дазволіла павысіць рэнтабельнасць.
Каментары