«Чалавек-павук — гэта не беларускі герой». У дзіцячых садках і школах забаранілі святкаваць Хэлоўін і апранаць касцюмы замежных герояў
У сацыяльных сетках быў апублікаваны ліст аддзела адукацыі Жлобінскага раёна, у якім паведамляецца, што кіраўнікі ўстаноў адукацыі павінны прыняць «вычарпальныя меры па недапушчэнні прапаганды правядзення мерапрыемстваў, якія супярэчаць традыцыйным каштоўнасцям беларускага народа». Прыкладамі такіх мерапрыемстваў былі названыя Дзень усіх Святых і касцюмы герояў «Хагі вагі». Поўны спіс забароненых у дзіцячых садках і школах святаў і герояў журналіст выдання «Флагшток» паспрабаваў высветліць у галоўным упраўленні адукацыі Гомельскага аблвыканкама.
Падчас званка ва ўпраўленне журналіст «Флагштока» назваўся бацькам дзіцяці, які вучыцца ў адной з гомельскіх школ. Галоўны спецыяліст аддзела выхаваўчай і сацыяльнай работы Святлана Лучкова пацвердзіла, што забароны сапраўды існуюць. Іх падрабязнасці бацькам павінны расказаць падчас найбліжэйшага бацькоўскага сходу.
Пры гэтым канкрэтнага спісу рэкамендацый чыноўніца агучыць не змагла:
«Я магу вам сказаць, што гэта, вядома ж, героі мультфільмаў, якія распаўсюджаныя на агульнанацыянальным тэлебачанні. Гэта героі беларускіх і рускіх народных казак. Але не імпартныя героі, якія не адпавядаюць беларускім каштоўнасцям. Чалавек-павук — гэта не беларускі герой».
На ўдакладняючае пытанне аб тым, якое дачыненне да беларускіх каштоўнасцяў маюць расійскія героі, чыноўніца паведпміла, што ў гэтым выпадку гаворка ідзе пра герояў савецкіх мультфільмаў.
Чыноўніца з упраўлення адукацыі таксама пацвердзіла, што святкаванне Хэлоўіна ў беларускіх школах з гэтага часу будзе забаронена:
«Хэлоўіны ў дзяржаўных установах не праводзяцца. У сувязі з тым, што ўсё ж такі праводзіліся Хэлоўіны, але не як грамадскае, грандыёзнае мерапрыемства, праводзіць гэтыя «святы» не дазволена».
Адказнасць за правядзенне забароненых святаў і выбар «правільных» дзіцячых касцюмаў, па словах чыноўніцы, будзе ўскладзена на кіраўнікоў устаноў адукацыі.
У лісце, разасланым Жлобінскім аддзелам адукацыі, пазначана, што забарона праводзіцца на падставе даручэння Савета Міністраў, зробленага 30 лістапада 2022 года. А таму да такіх мер, як выглядае, падштурхнуў данос сумна вядомай гродзенскай актывісткі Вольгі Бондаравай і іншых падобных дзеячаў. Раней праходзіла інфармацыя, што яна пачала вайну з Хагі Вагі.
Цяпер чытаюць
Загінуў беларускі добраахвотнік Васіль «Дзір» Рапіцкі6
Каментары