У Расіі знялі рэмейк беларускага фільма «У жніўні 44-га» Міхаіла Пташука
У ролі нямецкага дыверсанта — Аляксей Краўчанка, які зняўся ў юнацтве ў фільме «Ідзі і глядзі» пра трагедыю спаленых беларускіх вёсак.
У Расіі напярэдадні Дня Перамогі выйдзе шматсерыйны фільм «Аперацыя «Нёман», зняты паводле рамана Уладзіміра Багамолава «Момант ісціны. У жніўні сорак чацвёртага». Гэта не першая экранізацыя рамана Уладзіміра Багамолава. У 2001 годзе на экран выйшла стужка беларускага рэжысёра Міхаіла Пташука «У жніўні 44-га…», — нагадвае «Камсамольская праўда».
У фільме Пташука ролю дыверсанта Мішчанкі, які са сваёй групай спрабуе перашкодзіць вырашальнаму наступу савецкіх войскаў, сыграў Аляксандр Балуеў. А ў новым расійскім фільме «Аперацыя «Нёман» роля нямецкага дыверсанта дасталася Аляксею Краўчанку. На прэзентацыі фільма ў Маскоўскім музеі Перамогі на Паклоннай гары акцёр распавёў пра тое, як данесці да маладога пакалення разуменне ўсяго жаху вайны.
— Каб зразумець гэты жах, дастаткова адзін раз пабываць у Хатыні. Я шмат разоў быў у гэтай беларускай вёсцы. Перадаць словамі гэтыя эмоцыі нельга, туды трэба з'ездзіць і ўсё зразумець самому, — сказаў акцёр.
Ён згадаў, што першы раз пабываў у Хатыні ў 13 гадоў, калі рыхтаваўся да здымак у фільме Элема Клімава «Ідзі і глядзі».
— Хадзіў адзін, мне ніхто нічога не тлумачыў, Я проста глядзеў, — падзяліўся Аляксей.
Фільм «Ідзі і глядзі» выйшаў у 1985 годзе, да 40-годдзя Перамогі. У яго аснову ляглі творы беларускага пісьменніка Алеся Адамовіча «Хатынская аповесць», «Партызаны», «Карнікі» і дакументальная кніга «Я з вогненнай вёскі…», напісаная Адамовічам сумесна з Янкам Брылём і Уладзімірам Калеснікам. «Ідзі і глядзі» — гэта бязлітасны і шакуючы фільм пра злачынствы, якія чынілі фашысты на акупаванай тэрыторыі. Аляксей Краўчанка сыграў у ім галоўную ролю — падлетка Флёры, які становіцца сведкам жахаў нацысцкай карнай аперацыі.
Чытаць таксама:
«Беларусьфільм» пачаў здымкі блокбастара паводле рамана Караткевіча
Серыял Netflix «Царыца Клеапатра» выклікаў абурэнне ў Егіпце. І вось чаму
«Госця з будучыні» для новага пакалення. Выйшаў першы трэйлер фільма «Сто гадоў таму наперад»
Амерыканцы дабіліся вызвалення Юрыя Зянковіча. Ён быў прысуджаны да 11 гадоў зняволення18
Каментары