Мінабароны РФ планавала публічна дыскрэдытаваць Яўгена Прыгожына — СМІ
Мінабароны РФ планавала дыскрэдытаваць кіраўніка ПВК «Вагнер» Яўгена Прыгожына, вынікае з расследавання выдання Washington Post, якое азнаёмілася з уцечкай сакрэтных дакументаў ЗША. Пасля рэзкіх нападак Прыгожына на кіраўніцтва міністэрства, у ведамстве пачалі планаваць інфармацыйную вайну супраць яго.
«Калі Мінабароны збіраецца паспрабаваць супрацьстаяць публічным заявам Прыгожына, разважалі ва ўстанове, то яны павінны знайсці саюзнікаў з роўным статусам для барацьбы з ім, а не рабіць гэтага самі, — гаворыцца ў адным дакуменце, пазначаным грыфам «цалкам сакрэтна». — Але да канца не было ўпэўненасці, як Мінабароны зможа паспяхова весці інфармацыйную вайну з Прыгожыным, калі расійскі ўрад не забароніць яму рабіць публічныя заявы».
У дакуменце адзначалася, што інфармацыя атрымана шляхам перахопу або праслухоўвання паведамленняў.
Са студзеня Прыгожын сцвярджаў, што падкантрольным дзяржаве расійскім СМІ сказалі пазбягаць цытавання або згадкі ПВК «Вагнер». Але Прыгожын валодае медыяімперыяй з вэб-сайтаў і тэлеграм-каналаў, што дазваляе яму гучна заяўляць пра сябе.
Некаторы час Прыгожыну дазвалялі лаяць чыноўнікаў, гэта адпавядала пуцінскай стратэгіі падзелу палітычнай тэрыторыі і поля бітвы ва Украіне на асобныя групы, каб ніводная з іх не стала занадта магутнай, робіць высновы Washington Post.
«ПВК «Вагнер» і Прыгожын заўсёды ўяўлялі сабой праблему адзінаначалля ў гэтай вайне, — цытуе Washington Post Роба Лі, старшага навуковага супрацоўніка Інстытута даследаванняў замежнай палітыкі ў Філадэльфіі. — Пуціну падабаецца выкарыстоўваць групоўкі, якія канкурыруюць між сабой, як спосаб захавання ўлады, але гэта вельмі шкодна ў ваеннай аперацыі».
У сакрэтных дакументах няма адказу на пытанне, атрымлівала ПВК «Вагнер» боепрыпасы ці не, пра што апошнія месяцы заяўляў Прыгожын. Праверыць гэта складана праз тое, што боепрыпасы размяркоўваліся праз аператыўную групу ў Бахмуце.
Амерыканская разведка не выключае, што заявы Прыгожына могуць быць абгрунтаванымі, бо кіраўнік Генштаба Валерый Герасімаў, «па паведамленнях, загадаў спыніць пастаўкі боепрыпасаў … а таксама планаваў вайскова-транспартныя рэйсы, прызначаныя для перавозкі боепрыпасаў» у штаб ПВК у Растове-на-Доне, адзначаецца ў адным з дакументаў.
Акрамя таго, з уцечкі вынікае, што Прыгожын маліў Пуціна працягнуць набіраць наймітаў у турмах, пачаць навучаць нядаўна мабілізаваных і прасіў «садзейнічаць вярбоўцы замежных баевікоў, а менавіта афганцаў» ва Украіну.
У дакуменце са спасылкай на перахопы ФСБ гаворыцца, што Пуцін загадаў Прыгожыну вырашыць гэтыя пытанні з Мінабароны.
Камандзіры ПВК «Вагнер» адпраўлялі дрэнна навучаных зняволеных, якім часта пагражае пакаранне ў выпадку адступлення з перадавой, для нападу на ўкраінскія пазіцыі ў Бахмуце. Гэтая стратэгія прывяла да нязначных тэрытарыяльных перамог, але прыкметна вялікіх страт: паводле ацэнак ЗША, са снежня загінула каля паловы расійскіх вайскоўцаў.
Яўген Прыгожын звязаўся з прадстаўнікамі Кадырава для перадачы пазіцый у Бахмуце
Істэрыкі Прыгожына паказваюць, што Расія можа быць бліжэйшай да 1917 года, чым мы думаем
Прыгожын заявіў, што выведзе «Вагнер» з Бахмута 10 мая
Прыгожын заявіў, што выведзе вагнераўцаў з Бахмута. Што думаюць на гэты конт УСУ
Цяпер чытаюць
Каментары