ЗША анансавалі новыя санкцыі супраць Расіі, датычныя тэхналогій для іранскіх беспілотнікаў
Вашынгтон рыхтуецца абвясціць аб новых санкцыях супраць Расіі, якія закрануць экспарт тэхналогій, што выкарыстоўваюцца ў іранскіх беспілотніках. Пра гэта заявіў 30 мая дзяржсакратар ЗША Энтані Блінкен. Са слоў чыноўніка, пра санкцыі абвесцяць ужо ў сераду, 31 мая.
Акрамя экспарту, санкцыі таксама будуць скіраваныя супраць расійскай прапаганды і «дэзынфармацыі».
«Заўтра мы аб'явім аб новых мерах у сферы экспартнага кантролю ў дачыненні да тэхналогій, знойдзеных у іранскіх беспілотніках […] Таксама аб мерах па барацьбе з расійскай дэзынфармацыяй і па абароне праваабаронцаў у інтэрнэце», — заявіў Блінкен на сумеснай прэс-канферэнцыі з прэм'ер-міністрам Швецыі Ульфам Крыстэрсанам.
У сераду дзяржсакратар возьме ўдзел у нефармальнай сустрэчы кіраўнікоў МЗС краін НАТА ў Осла.
У сярэдзіне мая ў Белым доме заявілі, што са жніўня мінулага года Іран паставіў Расіі больш за 400 дронаў-камікадзэ. Пакуль беспілотнікі — гэта асноўная вайсковая дапамога, якую Тэгеран надае Маскве, аднак Крэмль разлічвае на большае.
Каментары