Пра вяртанне камандзіраў «Азова» Дзяніса Пракапенкі, Святаслава Паламара, Сяргея Валынскага, Алега Хаменкі і Дзяніса Шлегі паведаміў прэзідэнт Украіны Уладзімір Зяленскі, апублікаваўшы адпаведнае відэа.
Зяленскі асабіста сустракаў вайскоўцаў, якія за свой упарты супраціў пры абароне Марыупаля ва Украіне ўспрымаюцца як нацыянальныя героі, у аэрапорце Стамбула. Ён акурат знаходзіўся з візітам у Турцыі.
«Вяртаем дадому нашых герояў. Украінскія ваяры Дзяніс Пракапенка, Святаслаў Паламар, Сяргей Валынскі, Алег Хаменка, Дзяніс Шлега нарэшце будуць з роднымі», — напісаў ён у тэлеграме.
Узятыя расіянамі ў палон пяцёра камандзіраў палка «Азоў» былі абмененыя ў верасні 2022 года на ўкраінскага прарасійскага палітыка, кума прэзідэнта Расіі Уладзіміра Пуціна Віктара Медзведчука. Паведамлялася, што абмен адбыўся па ініцыятыве расійскага боку, а самі перамовы праходзілі ў Анкары, пад кіраўніцтвам Нацыянальнай разведвальнай арганізацыі Турцыі.
Адначасова з пяццю камандзірамі «Азова» былі таксама перададзеныя Украіне 200 іншых ваеннапалонных, а таксама 10 палонных іншаземцаў, некаторым з якіх да таго часу суды непрызнанай «ДНР» паспелі ўжо нават вынесці смяротныя пакаранні. Расійскіх жа ваеннапалонных пад той абмен патрапіла ўсяго 55.
Пасля гэтага камандзіры «Азова» нібыта павінны былі застацца ў Турцыі да канца вайны. Але цяпер на сайце прэзідэнта Украіны з'явілася паведамленне, што вяртанне камандзіраў «Азова» ва Украіну адбылося «па выніках перамоваў з турэцкім бокам».
Чытайце таксама:
Як насамрэч мянялі Медзведчука і камандзіраў «Азова». Невядомыя падрабязнасці
Washington Post: Пуцін асабіста адхіліў пярэчанні ФСБ і загадаў абмяняць азоўцаў на Медзведчука
«Абмянялі нацыстаў на кума», «насралі на галаву». У расійскіх пабліках гнеў і разгубленасць
«Мама, давай напішам заяву ў міліцыю, ён мяне ўжо дастаў». Маці школьніка з Брэста, які скончыў жыццё самагубствам, расказала пра цкаванне сына8
Каментары
Галоўнае, што Рэдзіс вяртаецца ⚔️