Многія беларускія карыстальнікі скардзяцца на занадта доўгае чаканне сваіх пакупак з маркетплейса Ozon. Як пішуць чытачы ў рэдакцыю партала Tochka.by, яны ўжо стаміліся чакаць сваіх замоў.
«Замовіў тавар 20 чысла, пераносілі дастаўку чатыры разы. Робім стаўкі, колькі яшчэ будуць пераносіць».
«Некалькі разоў пераносілі дастаўку. Сёння зноў прыйшло паведамленне, што тэрмін прывозу перанесены, ужо на 7 снежня».
Адзін чытач даслаў фота сваёй замовы з каментаром: «Вось так OZON дастаўляе тавары. Пасля затрымкі прыйшла разарваная скрынка. Балазе, настольная лямпа цэлая. Упершыню з такім сутыкаюся».
Камусьці пашанцавала яшчэ менш: «Пасля неаднаразовага пераносу прыйшло паведамленне аб адмене замовы. Грошы абяцаюць вярнуць, але справа не ў гэтым, проста навошта тады прымаць замову, калі не гатовыя выканаць».
«Спярша пераносілі, а пасля адмянілі, грошы вярнулі адразу».
Ва ўсім вінаватая «чорная пятніца»
Раней у прэс-службе Ozon пракаментавалі Tochka.by сітуацыю з масавымі скаргамі на дастаўку тавараў.
«У перыяд лістападаўскіх распродажаў мы атрымліваем у некалькі разоў больш замоў, чым звычайна, таму ў асобных выпадках тэрміны дастаўкі могуць павялічвацца — мы заўсёды інфармуем кліентаў аб тым, што тавары затрымліваюцца», — растлумачылі ў кампаніі.
Таксама там адзначылі, што, нягледзячы на гэта, яны, маўляў, імкнуцца трымаць высокі паказчык дастаўкі нават у пік сезону: у лістападзе 8 з 10 кліентаў у Беларусі атрымалі свае замовы ў тэрмін.
Уласна, на 1 снежня сітуацыя з дастаўкай не змянілася. Як гэтым разам удакладнілі ў кампаніі, «чорная пятніца» скончылася зусім нядаўна, таму некаторыя затрымкі яшчэ ўзнікаюць, але абяцаюць сітуацыю неўзабаве выправіць.
«Узмацняем склад у Мінску, прыцягваем дадатковых работнікаў», — дадалі ў Ozon.
У мінулым годзе многія карыстальнікі маркетплэйса таксама скардзіліся ў канцы лістапада і пачатку снежня на аналагічную сітуацыю з дастаўкай тавараў.
Цяпер чытаюць
«Вайна ўсё спіша». Беларускім удзельнікам гей-прайда ў Вільні пагражалі расправай ад імя беларускіх ваяроў за выкарыстанне бела-чырвона-белага сцяга37
Каментары