Сілавікі пацвердзілі, што мінскі школьнік, які «пагражаў» разнёй у Салігорску, стаў ахвярай сватынгу
Учора, 12 снежня, па розных салігорскіх суполках пракацілася хваля паведамленняў уз'юшаных жыхароў. Маўляў, нехта хоча зладзіць масавую разню ў мясцовых школах. Спасылкі вялі на канал «Салігорская гульня», на якім выкладалі пагрозы на адрас салігорскіх дзяцей. Мы хутка разабраліся ў гэтай сітуацыі і растлумачылі, у чым тут справа. А сёння нашы ўчарашнія здагадкі, «аператыўна праверыўшы інфармацыю», пацвердзілі сілавікі.
Паводле паведамлення Следчага камітэта, супрацоўнікі міліцыі «ўстанавілі асобу падлетка, ад імя якога была рассылка паведамленняў». Той нібыта не чакаў іх візіту, бо толькі ад іх даведаўся пра ўсю сітуацыю.
Пры аглядзе мабільнага тэлефона 15-гадовага падлетка міліцыянты высветлілі, што хлопец захапляецца камп'ютарнымі гульнямі і мае некалькі акаўнтаў у месенджарах і сацыяльных сетках. Напярэдадні яму ў тэлеграме прыйшло паведамленне з заклікам уступіць закрыты гульнявы чат горада Салігорска, якое ён праігнараваў. А пасля ў гэтым чаце акурат і былі выяўленыя паведамленні ад імя гэтага школьніка.
Паведамленні, як было выяўлена, «рассылаліся з абаненцкага нумара замежнай дзяржавы», што не прарочыць добрых перспектыў для пошукаў сапраўдных арганізатараў сватынгу. Агрэсіўнасць якога нібыта «ўвяла ў шок нават праваахоўнікаў».
Чытайце таксама:
У Салігорску рыхтуюць забойствы дзяцей? Не. Вось што адбылося і чаму панікаваць не варта
У Мінску 17-гадовы падлетак замовіў «мініраванне» ад імя знаёмага
Цяпер чытаюць
«Стаяць на сваім, кожны наколькі можа!» Вялікая гутарка з Наталляй Дулінай пра гопнікаў з ГУБАЗіКа, Калеснікаву і што там у каго ў калоніі10
Каментары