Экс-прэзідэнт можа аспрэчыць гэта рашэнне ў судзе.
Штат Мэн стаў другім пасля Каларада штатам ЗША, у якім імя Дональда Трампа афіцыйна забаронена ўключаць у бюлетэні на прэзідэнцкіх выбарах. Праўда, у абодвух выпадках гэтая забарона, хутчэй за ўсё, будзе аспрэчана ў судах, піша Бі-бі-сі.
Дзяржаўны сакратар штата Мэн Шэна Бэлоўз, як і Вярхоўны суд Каларада, абгрунтавала сваю пастанову ў дачыненні да Трампа 14-й папраўкай да Канстытуцыі, якая забараняе балатавацца ўдзельнікам мяцяжу.
Яна, сябра Дэмакратычнай партыі, лічыць, як і многія апаненты Трампа, што ён дамагаўся адмены вынікаў прэзідэнцкіх выбараў 2020 года і падбухторваў сваіх прыхільнікаў да штурму Капітолія ў студзені 2021 года.
Праціўнікі Трампа распачалі спробы забараніць яму балатавацца на падставе 14-й папраўкі ў некалькіх штатах.
Суды ў Мічыгане і Мінесоце адхілілі іх пазовы. Вярхоўны суд Каларада прыняў станоўчае рашэнне галасамі чатырох суддзяў супраць трох.
Ва ўсіх гэтых выпадках рашэнні будуць аспрэчаныя ў Вярхоўным судзе ЗША. Пры гэтым амерыканскія юрысты адзначаюць, што прадстаўнікам Каларада будзе нялёгка адстаяць рашэнне свайго суда, паколькі ў Вярхоўным судзе ЗША перавага ў суддзяў кансерватыўных поглядаў.
Калі забарона ў якім-небудзь штаце або штатах застанецца ў сіле, то Трамп аўтаматычна пазбавіцца галасоў выбаршчыкаў ад гэтага штата або штатаў.
На выбарах прэзідэнта ЗША галасы ўсіх выбаршчыкаў штата адыходзяць таму кандыдату, які набраў у гэтым штаце большасць, незалежна ад таго, колькі атрымалі канкурэнты.
Усяго выбаршчыкаў 538, у штата Каларада — 10 з іх, у штата Мэн — чатыры.
14-я папраўка да Канстытуцыі ЗША была прынятая ў XIX стагоддзі, пасля Грамадзянскай вайны, з тым, каб не дапусціць вяртання ва ўладу дзеячаў Канфедэрацыі паўднёвых штатаў, якія жадалі аддзялення ад Поўначы.
Цяпер чытаюць
Усе гадаюць, чаму Месяц змяніў сваё становішча на небе. Спыталі ў астранома, што адбываецца7
Усе гадаюць, чаму Месяц змяніў сваё становішча на небе. Спыталі ў астранома, што адбываецца
Часам нечаканая гісторыя беларускіх гімнаў: «Мы выйдзем шчыльнымі радамі», «Пагоня», «Жыве Беларусь», «Радзіма мая дарагая», «Магутны Божа» (з ВІДЭА)1212
Каментары