Ціханоўская гаварыла са спікерам фінскага парламента па-беларуску, і ён яе разумеў
Святлана Ціханоўская 11 студзеня прыбыла з візітам у Фінляндыю, дзе правяла сустрэчы з кіраўніцтвам гэтай краіны. Яе суразмоўцамі сталі прэм'ер-міністр Фінляндыі Петэры Орпа, спікер парламента Фінляндыі Юсі Хала-аха і міністарка замежных спраў гэтай краіны Эліна Валтанен.
Частка сустрэчы Ціханоўскай і спікера парламента Юсі Хала-аха прайшла нават на беларускай мове, бо гэты палітык таксама і навуковец-славіст, адпаведна валодае і іншымі славянскімі мовамі, у тым ліку і беларускай.
Падчас гэтай сустрэчы бакі абмяркоўвалі стварэнне групы «За дэмакратычную Беларусь» у парламенце Фінляндыі і яе далучэнне да працы міжнароднай кааліцыі групаў сяброў Беларусі. Акрамя таго гаварылі пра магчымасць правядзення слуханняў па Беларусі і прыняцця адпаведнай рэзалюцыі, як гэта было раней зроблена ў нямецкім Бундэстагу.
З прэм'ер-міністрам Фінляндыі Петэры Орпа Ціханоўская абмеркавала магчымасць дапамогі з боку гэтай краіны ў арганізацыі праграм рэабілітацыі для былых палітзняволеных і іх сем’яў, а таксама прыцягнення рэжыму да адказнасці на міжнародным узроўні.
Акрамя таго, Святлана Ціханоўская заклікала прэм’ер-міністра знайсці варыянты спрашчэння працэдур легалізацыі беларусаў у Фінляндыі, у тым ліку атрымання палітычнага прытулку — і зменшыць колькасць адмоваў у яго наданні.
Урэшце, з міністаркай замежных спраў Фінляндыі Элінай Валтанен Ціханоўская абмеркавала магчымасці супрацы ў межах міжнародных арганізацыяў.
Валтанен адзначыла, што Беларусь унесена ў парадак дня пасяджэнняў васьмёркі паўночна-балтыйскіх краінаў на гэты год. Таму пытанне нашай краіны будзе разглядацца асобна падчас гэтых мерапрыемстваў.
Акрамя таго, яна падкрэсліла, што Фінляндыя працягне дапамогу дэмакратычнай Беларусі, у прыватнасці падтрымку студэнтаў ЕГУ, праваабаронцаў, а таксама праекты ў межах Кантактнай групы ў Радзе Еўрасаюза.
Сёння таксама ў Фінляндыі пачала працу двухдзённая канферэнцыя пад назвай «Хельсінкскі Дыялог: будучыня Беларусі»
У ёй бяруць удзел 130 чалавек. Гэта прадстаўнікі беларускай грамадзянскай супольнасці, экспертнай супольнасці, палітыкі, прадстаўнікі Аб'яднанага пераходнага кабінета, Каардынацыйнай рады, дыпламаты, амбасадары, спецпасланнікі ў Беларусі, прадстаўнікі еўрапейскіх краін і ЗША. Святлана Ціханоўская адкрыла гэтую канферэнцыю разам з міністаркай замежных спраў Фінляндыі, а таксама генеральнай сакратаркай Парламенцкай асамблеі Рады Еўропы.
У сваёй прамове на адкрыцці канферэнцыі Святлана Ціханоўская падкрэсліла еўрапейскі выбар Беларусі і яе еўрапейскую будучыню.
Цяпер чытаюць
У пачатку 2000‑х трое настаўнікаў гісторыі збеглі ва Украіну ад «генацыду беларускага народа», які чыніў рэжым Лукашэнкі. Як склаўся іх лёс?11
Каментары
адзячыли ?