Памёр 26-гадовы рэжысёр-пастаноўшчык, які дапамагаў арганізоўваць балі Лукашэнкі
11 студзеня памёр рэжысёр-пастаноўшчык Іван Клешчанка-Чарнякоў. Хлопцу было ўсяго 26 гадоў. Ён доўгі час змагаўся з цяжкім захворваннем. Нягледзячы на малады ўзрост, Івану давяралі праводзіць маштабныя рэспубліканскія мерапрыемствы — у тым ліку навагоднія балі Лукашэнкі.
Іван Клешчанка-Чарнякоў нарадзіўся ў Гомелі, вучыўся ў Беларускім дзяржаўным універсітэце культуры і мастацтваў, а таксама ў магістратуры кафедры рэжысуры тэатралізаваных паказаў і свят у СПбГІК. Знаёмыя хлопца кажуць, што свае першыя пастаноўкі Іван пачаў рабіць, яшчэ калі быў вучнем Ірынінскай гімназіі ў Гомелі.
На пачатку пандэміі каранавіруса ў Беларусі, якой афіцыйныя ўлады не прызнавалі і нават называлі псіхозам, Іван разам з сяброўкай шыў ахоўныя касцюмы і маскі для медыкаў у бальніцах Мінска і іншых гарадах краіны.
На працягу трох гадоў Іван быў рэжысёрам-пастаноўшчыкам інклюзіўнага моднага шоу «Каляровыя сны», у якім бралі ўдзел выхаванцы інтэрнатаў для дзяцей з асаблівасцямі развіцця.
Сам Іван адзначаў, што яго першым праектам самага высокага ўзроўню, дзе ён быў галоўным рэжысёрам, стала шэсце пакаленняў і ўскладанне кветак да манумента Перамогі ў рамках акцыі «Беларусь памятае» ў 2022 годзе.
У 2023 годзе ў Дзень дзяржаўных сцяга, герба і гімна Беларусі хлопец быў рэжысёрам рытуалу ўшаноўвання дзяржаўных сімвалаў. Рэжысаваў Іван і рэспубліканскае свята «Александрыя збірае сяброў — 2023». Адтуль ён запосціў фота з чырвона-зялёным сцягам і сцягам БРСМ з подпісам: «Жыць цікавей пад правільнымі сцягамі».
Дарэчы, часопіс «Малады вучоны» апублікаваў артыкул Івана «Беларуская гіпербалізацыя»: нацыянальная сімволіка ў мастацкім рашэнні тэатралізаваных паказаў».
Сярод рэспубліканскіх свят, якімі займаўся Іван Клешчанка-Чарнякоў былі цырымонія ўзнагароджання пераможцаў Нацыянальнай тэатральнай прэміі, цырымонія ўшаноўвання таленавітай моладзі «Талент Беларусі» і нават навагоднія балі Лукашэнкі (ён быў адным з каманды-арганізатараў). Ставіў і гала-канцэрт «Любімую не аддаюць» падчас Форума патрыятычных сілаў.
Іван хварэў даўно і цяжка. У ліпені 2023 года ён пісаў у інстаграме пра сваю паездку дадому, які называў месцам моцы: «Заўсёды, прыязджаючы дадому, я перазараджаюся, улагоджваюся і з новымі сіламі вяртаюся ў тонус. Але гэты раз стаў выключэннем! Ад расслаблення ўсе мае болькі вылезлі вонкі, і па фізічным стане мой тыдзень ператварыўся ў пекла».
«Ты мужна змагаўся і казаў мне, што ўпэўнены ў выздараўленні. Але нешта пайшло інакш. Ляці дадому, Ванюша, такі малады і такі задорны», — напісала ў інстаграме спявачка Алена Ланская.
Развітанне з Іванам Клешчанкам-Чарняковым адбудзецца 13 студзеня.
Цяпер чытаюць
«У Віцебску заходзіў у тралейбус і казаў «Слава Украіне!». Украінца ў 67 гадоў пасадзілі за каменты, напісаныя пасля гібелі хроснай дачкі пад абстрэлам у Кіеве1212
Каментары