Беларус выйграў у Чарнагорыі буйны турнір па покеры і атрымаў вялізную суму
Малады гулец у покер з Беларусі Арцём Ласоўскі стаў пераможцам турніру $40,000 NLH 7-Handed Mystery Bounty у рамках серыі Triton Poker Super High Roller Series, якая праходзіць з 12 па 26 мая ў Чарнагорыі, паведамляе «Беларусь і свет».
Турнір доўжыўся два дні, сукупны прызавы фонд склаў 6 040 000 даляраў.
Наш суайчыннік, які ўпершыню ўдзельнічаў у серыі Triton, у заключнай гульні адолеў Самуэля Жу з Германіі.
Перамога прынесла Арцёму велізарную суму, якая склалася даволі незвычайным чынам.
У турнірах такога тыпу прызавыя складаюцца з двух частак: першая — фіксаваная, за занятае канкрэтнае месца, другая — варыятыўная, якая залежыць ад колькасці выбітых пакерыстам з гульні іншых гульцоў, а таксама проста ад удачы, бо праводзіцца фактычна латарэя.
Учора ўвечары ўдзельнікі турніра наўгад выцягвалі са скрыні канверты з запячатанымі ўнутры лісткамі паперы, на якіх значыліся тыя ці іншыя сумы. Арцём Ласоўскі, які выбіў з турніру адразу 12 супернікаў, меў права на 12 спробаў. У выніку яму трапіліся 8 канвертаў з мінімальнай сумай у 40 тысяч даляраў, 1 — з сумай 60 тысяч, і 3 — з сумай 100 тысяч.
У выніку Ласоўскаму па выніках турніру належыць атрымаць сукупна 1 349 000 даляраў. З іх 669 тысяч — непасрэдна за чэмпіёнства, а 680 тысяч — за выбітых у працэсе гульні апанентаў.
Цяпер чытаюць
«Беларусь, што з інтэрнэтам? Працуе праз раз!»: карыстальнікі А1 скардзяцца на праблемы, кампанія праблему прызнае1
Каментары