Сяргея Чалага і журналістаў Беларускага расследавальніцкага цэнтра абвясцілі ў міждзяржаўны вышук
Невядома, па якім артыкуле заведзеная адна ці некалькі спраў супраць журналістаў-расследавальнікаў.
Заснавальніка і кіраўніка Беларускага расследавальніцкага цэнтра Станіслава Івашкевіча і аўтара відэапраграм медыяпраекта Сяргея Чалага ўнеслі ў базу вышуку расійскага МУС. Раней паведамлялася пра знаходжанне ў гэтай базе траіх былых супрацоўнікаў БРЦ, а цяпер журналістаў «Бюро Медыя», піша БАЖ.
«Сёння можам казаць пра тое, што ў міждзяржаўны вышук абвешчаныя пяць былых і дзейных супрацоўнікаў Беларускага расследавальніцкага цэнтра, — распавёў Беларускай асацыяцыі журналістаў Станіслаў Івашкевіч. — Першымі на гэта звярнулі ўвагу члены каманды «Бюро Медыя», якія працавалі ў БРЦ на момант прызнання яго «экстрэмісцкай арганізацыяй». Гэта журналісты Аляксандр Ярашэвіч, Аляксей Карпека і Вольга Альхіменка. Калі ж мы праверылі базу расійскага МУС, то знайшлі ў росшуку яшчэ мяне і Сяргея Чалага».
У верасні 2022 года Беларускі расследавальніцкі цэнтр быў прызнаны рашэннем Вярхоўнага суда Беларусі «экстрэмісцкай арганізацыяй».
На думку Станіслава Івашкевіча, уключэнне пяці дзейных і былых супрацоўнікаў БРЦ не звязанае з нейкай крымінальнай справай у Расіі. Мяркуе, што, верагодна, гэта проста адлюстраванне саюзнага вышуку па наводцы Беларусі з нагоды крымінальных спраў, заведзеных у Беларусі.
Невядома і па якім артыкуле заведзеная адна ці некалькі спраў супраць журналістаў-расследавальнікаў.
«Але, улічваючы, што ў Беларусі сілавікі прыходзілі на адрасы мяне і іншых людзей, не абавязкова звязаных з БРЦ сёння, прыблізна ў адзін час, то гэта можа сведчыць пра тое, што гэта ўсё працяг справы, заведзенай крыху раней, — разважае Станіслаў Івашкевіч. — Мяркую, што ўнясенне ў расійскую базу — гэта тэхнічнае наступства таго, што нас абвесцілі ў вышук беларускія ўлады. А чаму ўлады звяртаюць на нас асаблівую ўвагу? Сярод іншага, на маю думку, праз тое, што нашыя публікацыі ў тым ліку прыносілі істотны эканамічны ўрон карупцыйным схемам пад прыкрыццём беларускіх уладаў па абыходзе заходніх санкцый супраць Беларусі і Расіі».
«Гэта прыкра і абуральна, але мы былі гатовыя ўжо даўно да ціску. Адказам на ціск з нашага боку ёсць актывізацыя нашых высілкаў, што мы і прадэманструем цягам бліжэйшых месяцаў. Чакаецца выхад шэрагу гучных расследаванняў», — падкрэсліў журналіст.
Беларускі расследавальніцкі цэнтр
Станіслаў Івашкевіч заснаваў Беларускі расследавальніцкі цэнтр у 2018 годзе. Каманда медыяпраекта вымушана з’ехала з Беларусі ў 2021 годзе пасля разгрому сілавікамі студыі БРЦ у Мінску.
Станіслаў Івашкевіч — неаднаразовы пераможца творчага конкурсу БАЖ «Вольнае слова», лаўрэат прэміі Global Anti Corruption Champions Award у 2023 годзе.
Эканаміст, публіцыст і журналіст Сяргей Чалы вядзе перадачы на YouTube-канале Беларускага расследавальніцкага цэнтра з 2022 года. Тут ён аўтар і вядоўца праграм «Навіны з Чалым» і «Чалы: эканоміка». Лаўрэат прэміі Global Belarus Solidarity Award 2020.
Беларускім топ-чыноўнікам у Валгаградзе раздалі каларадскія стужкі. Марзалюк застаўся з яблыневай ФОТЫ8
Каментары
Удивительно что заголовок и том, что в розыск объявлен Чалый, хотя сам по себе Чалый абсолютно безвреден для режима, его так, за компанию объявили в розыск.