Жыхары Нігерыі і ПАР зладзілі самы сапраўдны здзек з таксістаў эстонскай кампаніі

Жыхары Нігерыі і Паўднёва-Афрыканскай Рэспублікі, якія часта ладзяць войны ў сацсетках, перанеслі гэтыя «баявыя дзеянні» на ні ў чым не вінаватых кіроўцаў таксі кампаніі Bolt, засыпаўшы іх фальшывымі замовамі. Кампаніі прыйшлося адключыць магчымасць заказаў паміж гэтымі дзвюма афрыканскімі краінамі, піша Бі-бі-сі.

Карыстальнікі сацсетак з Нігерыі і ПАР, дзвюх найбуйнейшых эканомік Афрыкі, ужо даўно і рэгулярна троляць адзін аднаго.

У гэты раз тролінг распаўсюдзіўся за межы сетак, і пачатак яму мог пакласці твіт аднаго паўднёваафрыканскага карыстальніка, які з'явіўся ў аўторак.

«Калі мне сумна, я заказваю Bolt у Нігерыі, бо іх браты нас не паважаюць», — напісаў гэты карыстальнік у сетцы X.

Іншыя паўднёваафрыканцы падхапілі ідэю, нігерыйцы тут жа пачалі адказваць: рабіць замовы, напрыклад, у Кейптаўне, седзячы за пяць тысяч кіламетраў у Лагасе, і адмяняць іх, калі кіроўца ўжо прыехаў.

Кіроўца Bolt Муньярадзі Чыньяма, зімбабвіец, які працуе ў Кейптаўне, распавёў, што ён прыняў тры замовы, не здагадаўшыся, што яны — фальшывыя, і патраціў безвынікова шмат часу, паліва і грошай.

Акрамя таго, па словах Чыньяма, нігерыйскія фальшывыя пасажыры засыпалі яго абразлівымі рэплікамі ў дадатку таксафірмы.

Таксіст з горада Кано на поўначы Нігерыі сказаў, што ахвярамі гэтага злога розыгрышу сталі і ён, і многія яго калегі.

«Я тэлефанаваў, тэлефанаваў, а ён не адказваў, — распавёў гэты таксіст аб замове з замежнага нумара. — А потым ён адмяніў паездку».

У кампаніі Bolt сказалі Бі-бі-сі, што яны заблакавалі кліентаў, якія ўдзельнічалі ў гэтым тролінгу таксістаў, а таксама адключылі магчымасць заказаў у Нігерыі з паўднёваафрыканскіх тэлефонных нумароў і наадварот.

«Мы разумеем, якія наступствы гэтая сітуацыя мела для нашых партнёраў — кіроўцаў у Нігерыі і Паўднёвай Афрыцы», — абвяшчае заяву Bolt.

Bolt — гэта эстонская кампанія, якая забяспечвае заказ таксі праз дадатак. Гэты канкурэнт Uber, паводле даных на яго сайце, працуе ў 600 гарадах у дзясятках краін свету.

У Нігерыі Bolt працуе ў 33 гарадах, у ПАР — у 23.

У Нігерыі ў апошнія некалькі месяцаў моцна падаражэла паліва, і нігерыйскім таксістам было асабліва прыкра траціць каштоўныя літры безвынікова.

Зусім нядаўна карыстальнікі сацсетак з ПАР і Нігерыі зладзілі віртуальную сварку з-за фіналісткі конкурсу «Міс Паўднёвая Афрыка», якая, будучы напалову нігерыйкай, атрымала ў Інтэрнэце вал абраз ксенафобскага характару і знялася з конкурсу.

Да гэтага нігерыйцы і паўднёваафрыканцы біліся ў сетках за сваіх поп-зорак, Айру Стар і Тайлу, а акрамя таго, яны ўвесь час абменьваюцца абразамі на адрас сваіх футбольных зборных.

• 2
• 2
• 7
• 22
• 0
• 1
• 3
• 0