Чалавек, які ператварыў пластыкавую талерку ў адную з самых папулярных гульняў планеты, амерыканскі вынаходнік Вальтэр Фрэдэрык Морысан, пайшоў з гэтага свету на 90-м гаду жыцця.
«Гэтая простая гульня прарвалася на ўсе кантыненты. «Лятучая талерка» трапіла, здаецца, у больш дамоў, чым усе астатнія гульні на свеце, — зазначыў у афіцыйнай заяве з жалобнай нагоды Кей Маклеф, адвакат і распарадчык спадчынай Морысана. — Як можна было прабавіць юнацтва без таго, каб не навучыцца шпурляць «талерку»?».
Морысан вынайшаў «лятучую талерку» пры канцы 40-х і назваў яе «сабачы паднос», — усё праз ягоную з жонкай завядзёнку хадзіць на каліфарнійскі пляж і шпурляць-лавіць круглы паднос для пірагоў. Па вяртанні з другой сусветнай вайны Морысан пачаў дасканаліць сваёй вынаходства. Праз колькі гадоў ён урэшце прадаў гатовы патэнт прамыслоўцам, і лятучая талерка ўрэшце атрымала назву, пад якой яе ведаюць ва ўсім свеце, «Фрызбі», па аналогіі з вядомым круглым амерыканскім «фрызбі-пірагом».
Паводле ацэнак за ўсе гэтыя гады ў свеце было прададзена больш за 200 мільёнаў толькі ліцэнзійных «лятучых талерак». У сваю чаргу чалавецтва, натхнёнае вынаходствам Морысана, завінулася і прыдумала «Ультыматыўнае фрызбі» — камандную гульню накшталт гандбола, дзе замест мяча — той жа выславёны пляскаты дыск. А яшчэ з'явіўся «Дыск-Гольф», у якім трэба трапіць «лятучай талеркай» у лунку за як мага меншую колькасць кідкоў, а таксама «Сабачае фрызбі», дзе ў лоўлі талеркі спаборнічаюць нашыя чацьвераногія сябры.
У 2001 Морысан разам з гісторыкам і адданым шанавальнікам гульні фрызбі Філам Кэнэдзі напісаў мэмуары пра сваё знакамітае вынаходства. Сёння ж, з нагоды смерці суаўтара, той гісторык апублікаваў свой асабісты зварот, у якім пазычыў нябожчыку «гладкага палёту».
Каментары