Затрымалі на вакзале, пра справу амаль ніхто не ведаў. Падрабязнасці суда над найлепшым футбалістам Беларусі-2021
Андрэй Салавей і ягоная жонка Аксана атрымалі хатнюю «хімію» за ўдзел у пратэстах. Абставіны справы сталі вядомыя «Трыбуне».
Форварда «Славіі» Андрэя Салаўя і ягоную жонку Аксану судзілі за пратэсты 19 лістапада ў судзе Першамайскага раёна Мінска. Яны атрымалі па два з паловай гады хатняй хіміі.
Як аказалася, навіны пра суд над форвардам у «Славіі» выклікалі здзіўленне. Ніхто з гульцоў нават не падазраваў і не здагадваўся, што яшчэ ў лістападзе над іх аднаклубнікам адбыўся суд. У курсе сітуацыі былі толькі клубныя кіраўнікі і галоўны трэнер, і яны нікому нічога не распавядалі.
Сітуацыя закруцілася каля двух месяцаў таму, у пачатку кастрычніка, калі Салавей разам з жонкай вярталіся з Бярозы, малой радзімы мужа і жонкі, у Мінск. Пара збіралася ехаць на цягніку, але проста перад пасадкай на вакзале да іх падышлі сілавікі.
Андрэя і Аксану даставілі ў мясцовае РАУС. Сілавікоў зацікавіла нейкая фатаграфія, на якой былі гулец і ягоная жонка на мірнай акцыі пратэсту ў 2020 годзе ў Мінску. Салаўям паставілі крымінальны «народны» артыкул. У той жа дзень мужа і жонкі адпусцілі да суда пад заклад.
Верагодна, увагу да сябе Салаўі прыцягнулі пасля таго, як сілавікі затрымалі аднаго са сваякоў жонкі футбаліста за ўдзел у пратэстах і вывучылі ў тэлефоне розныя чаты і перапіскі. Паводле звестак «Трыбуны», гэта здарылася яшчэ ў першай палове 2024 года.
Затрыманне і суд на ўдзел Салаўя ў трэніровачным працэсе і гульнях не паўплывалі. Фінішныя туры чэмпіянату Беларусі не меркавалі выездаў за суткі: перадапошні «Славія» праводзіла ў суседнім Гомелі і выязджала ў дзень гульні, а закрывала чэмпіянат у Мазыры.
У клубе ведаюць пра прысуд футбалісту, у тым ліку пра неабходнасць утрымліваць чвэрць заробку. Форвард у «Славіі» атрымлівае максімум, даступны для не гульцоў зборнай Беларусі — 5250 рублёў да выліку падаткаў.
Кантракт са «Славіяй» у форварда, якому 13 снежня споўніцца 30 гадоў, заканчваецца 31 снежня 2024 года. Крыніцы «Трыбуны» сумняваюцца, што ў Мазыры захочуць падаўжаць з гульцом пагадненне. Або, як мяркуюць тыя ж суразмоўцы, клубу проста не дадуць гэтага зрабіць зверху.
І яшчэ пытанне, ці зможа найлепшы футбаліст Беларусі-2021 у прынцыпе працаўладкавацца ў якой-небудзь камандзе чэмпіянату краіны пасля гэтай гісторыі.
«Прачытайце яе гісторыю». Лукашэнку давялося апраўдвацца перад Пуціным за георгіеўскія стужкі11
Каментары