Zatrymali na vakzale, pra spravu amal nichto nie viedaŭ. Padrabiaznaści suda nad najlepšym futbalistam Biełarusi-2021
Andrej Sałaviej i jahonaja žonka Aksana atrymali chatniuju «chimiju» za ŭdzieł u pratestach. Abstaviny spravy stali viadomyja «Trybunie».
Forvarda «Słavii» Andreja Sałaŭja i jahonuju žonku Aksanu sudzili za pratesty 19 listapada ŭ sudzie Pieršamajskaha rajona Minska. Jany atrymali pa dva z pałovaj hady chatniaj chimii.
Jak akazałasia, naviny pra sud nad forvardam u «Słavii» vyklikali ździŭleńnie. Nichto z hulcoŭ navat nie padazravaŭ i nie zdahadvaŭsia, što jašče ŭ listapadzie nad ich adnakłubnikam adbyŭsia sud. U kursie situacyi byli tolki kłubnyja kiraŭniki i hałoŭny trenier, i jany nikomu ničoha nie raspaviadali.
Situacyja zakruciłasia kala dvuch miesiacaŭ tamu, u pačatku kastryčnika, kali Sałaviej razam z žonkaj viartalisia ź Biarozy, małoj radzimy muža i žonki, u Minsk. Para źbirałasia jechać na ciahniku, ale prosta pierad pasadkaj na vakzale da ich padyšli siłaviki.
Andreja i Aksanu dastavili ŭ miascovaje RAUS. Siłavikoŭ zacikaviła niejkaja fatahrafija, na jakoj byli hulec i jahonaja žonka na mirnaj akcyi pratestu ŭ 2020 hodzie ŭ Minsku. Sałaŭjam pastavili kryminalny «narodny» artykuł. U toj ža dzień muža i žonki adpuścili da suda pad zakład.
Vierahodna, uvahu da siabie Sałaŭi pryciahnuli paśla taho, jak siłaviki zatrymali adnaho sa svajakoŭ žonki futbalista za ŭdzieł u pratestach i vyvučyli ŭ telefonie roznyja čaty i pierapiski. Pavodle źviestak «Trybuny», heta zdaryłasia jašče ŭ pieršaj pałovie 2024 hoda.
Zatrymańnie i sud na ŭdzieł Sałaŭja ŭ trenirovačnym pracesie i hulniach nie paŭpłyvali. Finišnyja tury čempijanatu Biełarusi nie mierkavali vyjezdaŭ za sutki: pieradapošni «Słavija» pravodziła ŭ susiednim Homieli i vyjazdžała ŭ dzień hulni, a zakryvała čempijanat u Mazyry.
U kłubie viedajuć pra prysud futbalistu, u tym liku pra nieabchodnaść utrymlivać čverć zarobku. Forvard u «Słavii» atrymlivaje maksimum, dastupny dla nie hulcoŭ zbornaj Biełarusi — 5250 rubloŭ da vyliku padatkaŭ.
Kantrakt sa «Słavijaj» u forvarda, jakomu 13 śniežnia spoŭnicca 30 hadoŭ, zakančvajecca 31 śniežnia 2024 hoda. Krynicy «Trybuny» sumniavajucca, što ŭ Mazyry zachočuć padaŭžać z hulcom pahadnieńnie. Abo, jak miarkujuć tyja ž surazmoŭcy, kłubu prosta nie daduć hetaha zrabić źvierchu.
I jašče pytańnie, ci zmoža najlepšy futbalist Biełarusi-2021 u pryncypie pracaŭładkavacca ŭ jakoj-niebudź kamandzie čempijanatu krainy paśla hetaj historyi.
Kamientary