Праз санкцыі беларускія півавары не могуць выпускаць бляшанкавае піва ў пінтах
Кампанія «Лідскае піва» змяніла фармат бляшанкі для аднаго са сваіх прадуктаў. Цяпер тару патрэбнага аб'ёму нельга імпартаваць праз санкцыі, і з-за гэтага беларускія півавары не могуць выпускаць піва ў пінтах, піша Office Life.
Гаворка ідзе пра брэнд піва Koronet Lager, якое раней выпускалі ў банках 0,568 літра (г. зн. у пінтах). Цяпер аб'ём упакоўкі складае 0,45 літра, а на бляшанцы з'явіўся надпіс «4/5 пінты».
«Такая змена выкліканая вымушанымі абставінамі, — расказалі Office Life у кампаніі. — У сувязі з санкцыямі, уведзенымі ў дачыненні да Беларусі, прадпрыемства сутыкнулася з цяжкасцямі ў пастаўках бляшанак аб'ёмам 0,568 літра ад заходнееўрапейскіх пастаўшчыкоў».
У «Лідскім піве» адзначаюць, што ўважліва манітораць сітуацыю і пры першай жа магчымасці вернуць фармат піва ў пінтах. Пры гэтым піва ў шкляных бутэльках з такім жа аб'ёмам выпускаецца гэтак жа сама, як і раней.
Паводле ўнутраных даных кампаніі, найбольш упадабаным фарматам у спажыўцоў Koronet Lager з'яўляецца якраз бляшанка, якая займае 36% продажаў у адзінках.
Каментары