Навошта Мінску кальцавая лінія метро, і колькі станцый яна будзе налічваць
Галоўны інжынер прадпрыемства «Мінскметрапраект» Георгій Пратасаў распавёў аб планах развіцця сталічнага метрапалітэна, пішуць «Мінск-Навіны».
Ён нагадаў, што на Маскоўскай лініі за станцыяй «Уручча» хацелі пабудаваць яшчэ адну — «Смаленскую», а за «Малінаўкай» — «Шчомысліцу». Працягнуць Аўтазаводскую лінію станцыямі «Красны Бор» за «Каменнай Горкай» і «Шабаны» за «Магілёўскай».
Але работы пакуль не вядуць. Па словах Пратасава, «метро развіваецца ў адпаведнасці з бягучай горадабудаўнічай сітуацыяй і патрэбамі жыхароў», станцыі з'яўляюцца там, дзе ёсць высокая пасажырская нагрузка.
Што тычыцца Зялёналужскай лініі, якая цяпер налічвае сем станцый, у тым ліку тры, якія адкрыліся напярэдадні Новага года, то метрабудаўнікі працуюць над участкам ад «Юбілейнай плошчы» да будучай станцыі «Парк дружбы Народаў» на плошчы Бангалор.
«На гэтым участку няпростыя інжынерна-геалагічныя ўмовы: там высокі ўзровень грунтавых вод. Прыйдзецца ўзводзіць воданепранікальныя сцены катлаванаў і выкарыстоўваць будаўнічае водапаніжэнне, прымяняць магутную гідраізаляцыю. Дарэчы, праходку амаль усіх тунэляў на ўчастку ажыццявім ніжэй за ўзровень грунтавых вод», — патлумачыў Пратасаў.
Ён расказаў і пра чацвёртую, кальцавую лінію метро, па якой цяпер вядзецца перадпраектная прапрацоўка. На ёй прадугледжваецца 17 станцый з перагонамі даўжынёй 1,5-2 кіламетры, а таксама адно ці два дэпо.
«Гэтая падземная траса будзе эфектыўна працаваць у спалучэнні з транспартна-перасадачнымі вузламі», — лічыць прадстаўнік «Мінскметрапраекта».
Ён дадае, што ўзвядзенне чацвёртай лініі будзе няпростым, паколькі запатрабуе будаўніцтва вялікай колькасці перасадкавых вузлоў з дзейнымі станцыямі астатніх ліній, якое трэба будзе выканаць без прыпынення руху цягнікоў.
Цяпер чытаюць
«Яны чамусьці думаюць, што іх зараз згвалцяць». Прапаганда кінулася тушыць абурэнне беларусаў 150 тысячамі пакістанцаў18
Каментары